មនុស្សស្លាប់កើនដល់ជាង ១០០នាក់ ដោយសារព្យុះត្រូពិក Nalgae នៅហ្វីលីពីន 

ប្រធានាធិបតីហ្វីលីពីនលោក Ferdinand Marcos Jr នៅថ្ងៃអង្គារទី០១ខែវិច្ឆិកានេះ បានចុះទៅត្រួតពិនិត្យនៅខេត្តភាគខាងត្បូង ដែលរងគ្រោះដោយការរអិលបាក់ដី បណ្តាលមកពីព្យុះត្រូពិក Nalgae ខណៈអ្នកស្លាប់កើនដល់ ១១០នាក់ហើយ។

ទីភ្នាក់ងារគ្រោះមហន្តរាយនិយាយថា មនុស្សជាង១០០នាក់បានរងរបួស និង៣៣នាក់ទៀតកំពុងបាត់ខ្លួន ដោយសារទឹកជំនន់រីករាលដាល និងការរអិលបាក់ដីជាច្រើន។

ទិន្នន័យរបស់រដ្ឋាភិបាលបានបង្ហាញថា ព្យុះ Nalgae បានធ្វើដំណើរឆ្ពោះទៅកាន់ភាគខាងត្បូងប្រទេសចិន បន្ទាប់ពីបំផ្លាញកសិផលក្នុងទំហំទឹកប្រាក់២២លានដុល្លារ និងហេដ្ឋារចនាសម្ព័ន្ធ ១៣លានដុល្លារ។

គិតត្រឹមខែវិច្ឆិកាឆ្នាំនេះ Nalgae គឺជា​ព្យុះ​បំផ្លិចបំផ្លាញខ្លាំង​បំផុតលំដាប់​ទី​ពីរ ​ដែល​វាយ​ប្រហារ​ហ្វីលីពីន បន្ទាប់​ពី​ព្យុះ​ត្រូពិក Megi បាន​សម្លាប់​មនុស្ស​ចំនួន ២១៤ នាក់​កាល​ពី​ខែ​មេសា។

នៅថ្ងៃអង្គារ លោក Marcos បានបញ្ជាឲ្យក្រុមមន្ត្រី ចែកចាយកញ្ចប់ជំនួយឲ្យបានលឿនជាងមុន និងអំពាវនាវឲ្យមានការរៀបចំកាន់តែប្រសើរឡើង មុនពេលព្យុះត្រូពិកចំនួនបួនបន្ថែមទៀត ត្រូវបានព្យាករណ៍ថានឹងវាយប្រហារមុនដំណាច់ឆ្នាំនេះ។

គួរបញ្ជាក់ថា ភាគច្រើននៃអ្នកស្លាប់និងរបួសដោយសារព្យុះ Nalgae គឺស្ថិតនៅក្នុងតំបន់ស្វយ័តភាគខាងត្បូង Bangsamoro។

ហ្វីលីពីន ដែលជាប្រទេសមានប្រជុំកោះជាង ៧៦០០ តែងតែជួបប្រទះខ្យល់ព្យុះទីហ្វុងជាមធ្យម ២០ ក្នុងមួយឆ្នាំ ហើយការបាក់ដីជាញឹកញាប់ និងគ្រោះទឹកជំនន់ ត្រូវបានគេស្តីបន្ទោសលើឥទ្ធិពលនៃបម្រែបម្រួលអាកាសធាតុ៕

ប្រែសម្រួល៖ Vann Vann

ប្រភព៖ Reuters

ចុចអាន៖ គ្រោះរញ្ជួយដីកម្រិត ៦.៤រ៉ិចទ័រ វាយប្រហារប្រទេស ហ្វីលីពីន