ហេតុអ្វីបានជាស្ត្រីស្លាប់ច្រើនជាងបុរសក្នុងហេតុការណ៍ជាន់គ្នានៅ កូរ៉េខាងត្បូង?

ក្នុងចំណោមអ្នកស្លាប់ចំនួន ១៥៤ នាក់ពីការសង្កត់ជាន់គ្នាក្នុងពិធីបុណ្យ Halloween កាលពីចុងសប្តាហ៍មុននៅតំបន់ Itaewon ជិត ២ ភាគ ៣ គឺជាស្ត្រី ។ គិតត្រឹមថ្ងៃចន្ទ ស្ត្រីសរុបចំនួន ៩៨ នាក់បានស្លាប់ក្នុងឧបទ្ទវហេតុដ៏សោកសៅនេះ បើប្រៀបធៀបនឹងបុរសមានតែ ៥៦ នាក់ប៉ុណ្ណោះ ។

ពាក់ព័ន្ធនឹងរឿងរ៉ាវនេះដែរធ្វើឲ្យមនុស្សជាច្រើនងឿងឆ្ងល់ថា ហេតុអ្វីបានជាឧបទ្ទវហេតុនេះបណ្ដាលឲ្យស្ត្រីមានគ្រោះថ្នាក់ ក៏ដូចជាបាត់បង់ជីវិតច្រើនជាងបុរសបែបនេះ ។

អ្នកជំនាញផ្នែកវេជ្ជសាស្រ្តមួយចំនួនបាននិយាយថា អ្នកដែលមានតួខ្លួនតូច កម្ពស់ទាប និងកម្លាំងរាងកាយតិច ងាយនឹងរងរបួស ឬថប់ដង្ហើមបំផុត ក្នុងស្ថានភាពដែលមានហ្វូងមនុស្សចង្អៀតណែនណាន់តាន់តាប់បែបនេះ ។

ដោយសារការដកដង្ហើមទាមទារចលនាថេរនៃសាច់ដុំផ្លូវដង្ហើម និងសន្ទះទ្រូង ដូច្នេះអ្នកដែលមានរាងកាយទន់ខ្សោយអាចធ្លាក់ខ្លួនជាជនរងគ្រោះ នៅពេលដែលមនុស្សគ្រប់គ្នាព្យាយាមរើបម្រាស់ក្នុងស្ថានភាពជាប់គាំងដើម្បីការរស់រានមានជីវិតរបស់ពួកគេ ។

លោក Park Jae-Sung សាស្ត្រាចារ្យផ្នែកការពារអគ្គីភ័យ និងគ្រោះមហន្តរាយនៅសាកលវិទ្យាល័យ Soongsil Cyber ​​បាននិយាយថា “កម្លាំងដើម្បីទប់ទល់នឹងសម្ពាធថប់សម្រាប់ស្ត្រីជាទូទៅ គឺខ្សោយជាងបុរស ដែលជាមូលហេតុធ្វើឲ្យស្ត្រីភាគច្រើនងាយនឹងអស់ដង្ហើម ជាក់ស្ដែងក្នុងឧបទ្ទវហេតុកាលពីពេលថ្មីៗនេះ គឺជនរងគ្រោះជាស្ត្រី” ។

យោងតាមសេវាវិទ្យាស្ថានសុខភាពជាតិបានឲ្យដឹងថា បុរសជនជាតិកូរ៉េជាមធ្យម មានកម្ពស់ ១៧០.៦ សង់ទីម៉ែត្រ និងទម្ងន់ ៧២.៧ គីឡូក្រាម ខណៈដែលស្ត្រីកូរ៉េជាមធ្យម មានកម្ពស់ ១៥៧.១ សង់ទីម៉ែត្រ និងទម្ងន់ ៥៧.៨ គីឡូក្រាម ៕

ប្រែសម្រួលដោយ ៖ ជីវ័ន្ត

ប្រភព ៖ Korea Herald

ចុចអាន ៖ សាក្សី ៖ ហ្វូងមនុស្សក្នុងបុណ្យ Halloween គិតថា ជាការសម្ដែងជាន់គ្នា​ស្លាប់ ទើបរាំសប្បាយនៅមុខរថយន្តសង្គ្រោះបន្ទាន់