រូបភាពពីផ្កាយរណបឃើញរថភ្លើង កូរ៉េខាងជើង ចេញពីប្រទេស សង្ស័យដឹក​អាវុធទៅឲ្យ រុស្ស៊ី

ក្រុមស្រាវជ្រាវរបស់សហរដ្ឋអាមេរិកដែលមានឈ្មោះថា 38 North បាននិយាយថា រថភ្លើងមួយខ្សែបានធ្វើដំណើរពីកូរ៉េខាងជើងទៅកាន់ប្រទេសរុស្ស៊ី ចំពេលមានការចោទប្រកាន់ថា ក្រុងព្យុងយ៉ាងកំពុងនាំចេញអាវុធទៅកាន់ទីក្រុងមូស្គូ ។

ក្រុមនេះបានចេញផ្សាយរូបភាពពីផ្កាយរណបកាលពីថ្ងៃសុក្រ និងបាននិយាយថា រថភ្លើងដែលមានទូរចំនួន ៣ បានឆ្លងកាត់ស្ពានមួយរវាងព្រំដែននៃប្រទេសទាំងពីរ ខណៈគោលបំណងនៃប្រតិបត្តិការ និងទំនិញដែលរថភ្លើងដឹកនោះ មិនទាន់អាចកំណត់បានពីរូបភាពនៅឡើយទេ ។

ទន្ទឹមនោះ ការអះអាងនេះកើតឡើង ស្របពេលដែលអ្នកនាំពាក្យសេតវិមានលោក John Kirby បាននិយាយកាលពីថ្ងៃពុធថា កូរ៉េខាងជើងកំពុងផ្គត់ផ្គង់ដោយសម្ងាត់ដល់ប្រទេសរុស្ស៊ីជាមួយនឹងគ្រាប់កាំភ្លើងធំយ៉ាងច្រើនសន្ធឹកសន្ធាប់ បើទោះជាកាល​ពី​ខែ​កញ្ញា ទីក្រុង​ព្យុងយ៉ាង​បាន​និយាយ​ថា ខ្លួន​មិន​ដែល​ផ្គត់ផ្គង់​សព្វាវុធ​ដល់​រុស្ស៊ី​ ហើយ​ក៏​គ្មាន​គម្រោង​ធ្វើ​ដូច្នោះ​ដែរ ។

សេវាកម្មរថភ្លើងដឹកទំនិញរវាងកូរ៉េខាងជើង និងរុស្ស៊ីបានបញ្ឈប់នៅឆ្នាំ ២០២០ ដោយសារជំងឺរាតត្បាតកូវីដ ១៩ ប៉ុន្តែប្រព័ន្ធផ្សព្វផ្សាយរុស្ស៊ីបានរាយការណ៍កាលពីថ្ងៃពុធថា ប្រតិបត្តិការលើផ្លូវដែកមួយនេះបានបន្តឡើងវិញ ប៉ុន្តែផ្ដោតសំខាន់ការនាំចូលសម្លៀកបំពាក់ និងស្បែកជើងពីកូរ៉េខាងជើងប៉ុណ្ណោះ ។

ដោយឡែក ទីភ្នាក់ងារសារព័ត៌មានបាននិយាយថា រុស្សីអាចកំពុងព្យាយាមនាំចូលសម្លៀកបំពាក់ និងស្បែកជើងសម្រាប់បុគ្គលិកយោធាដែលដាក់ពង្រាយក្នុងប្រទេសអ៊ុយក្រែន ដោយសារមានរបាយការណ៍ពីការខាតបង់យ៉ាងធ្ងន់ធ្ងរនៃទំនិញយោធារបស់ទីក្រុង ៕

ប្រែសម្រួលដោយ ៖ ជីវ័ន្ត

ប្រភព ៖ NHK