ប្រទេសកាន់តែច្រើន បានចាប់ផ្ដើមរឹតបន្ដឹង ឬពិចារណារឹតបន្តឹង ចំពោះអ្នកដំណើរមកពីប្រទេសចិន ក្រោយប្រទេសនេះ បានផ្ទុះកូវីដជាថ្មីនារយៈពេលចុងក្រោយ។ នេះបើតាមការចុះផ្សាយរបស់កាសែតថៃ Bangkok Post។

ប្រទេសទាំងនោះ រួមមាន៖ សហរដ្ឋអាមេរិក (ចាប់ផ្ដើមធ្វើតេស្តកូវីដ-១៩ លើអ្នកដំណើរមកពីចិន ហុងកុង ម៉ាកាវ ពីថ្ងៃទី៥ មករា), ចក្រភពអង់គ្លេស (តម្រូវឲ្យអ្នកដំណើរតេស្ដអវិជ្ជមាន មុនចាកចេញពីចិន ពីថ្ងៃទី៥ មករា), បារាំង (តម្រូវឲ្យអ្នកដំណើរបង្ហាញលទ្ធផលអវិជ្ជមាន តិចជាង ៤៨ម៉ោង មុនចាកចេញពីប្រទេសចិន និងធ្វើតេស្តរហ័សពេលទៅដល់បារាំង ពីថ្ងៃទី១ ខែមករា)។

ប្រទេសផ្សេងទៀត ដែលចាប់ផ្ដើមអនុវត្តគោលការណ៍ស្រដៀងប្រទេសទាំង ៣ ខាងលើដែរ រួមមាន ឥណ្ឌា ជប៉ុន អ៊ីតាលី អេស្ប៉ាញ​ ម៉ាឡេស៊ី និងកូរ៉េខាងត្បូង។ ចំណែកអូស្រ្ដាលី និងហ្វីលីពីន កំពុងតាមដានសភាពការណ៍ ដោយមិនទាន់ចេញគោលការណ៍ថ្មីណាមួយចំពោះអ្នកដំណើរពីប្រទេសចិននៅឡើយទេ។

គួរបញ្ជាក់ផងដែរថា ប្រទេសមួយចំនួនបានរិះគន់ប្រទេសចិន ថាមិនបានផ្ដល់ព័ត៌មាន និងទិន្នន័យជាក់លាក់ពីការឆ្លងរាលដាលជាថ្មីនៃកូវីដ-១៩។ រដ្ឋាភិបាលចិន បានបដិសេធចំពោះការរិះគន់ទាំងនោះ ប៉ុន្តែអង្គការសុខភាព​ពិភពលោក កាលពីថ្ងៃសុក្រម្សិលមិញ បានទទូចឲ្យចិន ផ្ដល់ទិន្នន័យជាក់លាក់ និងទាន់សភាពការណ៍ពីស្ថានភាពកូវីដ​ក្នុងប្រទេសរបស់​ខ្លួន ដូចជាចំនួនអ្នកកំពុងសម្រាកព្យាបាលក្នុងមន្ទីរពេទ្យ ចំនួនអ្នកស្លាប់ និងចំនួនអ្នកទទួលបានវ៉ាក់សាំងជាដើម៕