ឆ្នាំថ្មី រុស្ស៊ី ប្រើយន្តហោះដ្រូនរបស់ អ៊ីរ៉ង់ វាយប្រហារលើ អ៊ុយក្រែន

យោធារុស្ស៊ីបានបន្តបើកការវាយប្រហារលើទីក្រុងនានាក្នុងប្រទេសអ៊ុយក្រែនសម្រាប់ឆ្នាំថ្មីនេះ ទោះយ៉ាងណាយោធាអ៊ុយក្រែនបានស្ទាក់ចាប់យន្តហោះដ្រូនផលិតដោយអ៊ីរ៉ង់ចំនួន ៤៥ គ្រឿង ដែលរុស្ស៊ីបានបញ្ជូនមកវាយប្រហារកាលពីថ្ងៃអាទិត្យ ។

អភិបាលនៃតំបន់កៀវលោក Oleksiy Kuleba បាននិយាយថា ការវាយប្រហារដោយយន្តហោះដ្រូនរបស់រុស្ស៊ីបានកំណត់គោលដៅទៅលើទីតាំងថាមពល និងធ្វើឲ្យខូចខាតហេដ្ឋារចនាសម្ព័ន្ធមួយចំនួនផងដែរ ។

ស្របពេលជាមួយគ្នានេះ អនុប្រធានការិយាល័យប្រធានាធិបតីអ៊ុយក្រែន លោក Kyrylo Tymoshenko បាននិយាយនៅក្នុងការបង្ហោះតាមប្រព័ន្ធផ្សព្វផ្សាយសង្គមថា ការបាញ់ផ្លោងរបស់រុស្សីនៅតំបន់ Kherson ភាគខាងត្បូង បានសម្លាប់មនុស្សម្នាក់ និងរងរបួស ២០ នាក់ ជាពិសេសបានកម្ទេចមន្ទីរពេទ្យកុមារផងដែរ ។

ចំណែកឯកអគ្គរដ្ឋទូតសហរដ្ឋអាមេរិកប្រចាំប្រទេសអ៊ុយក្រែនលោកស្រី Bridget Brink ក៏បានបង្ហោះសារលើបណ្ដាញ Twitter ផងដែរថា រុស្ស៊ីយ៉ាងត្រជាក់ និងកំសាក សម្រាប់ការវាយប្រហារលើអ៊ុយក្រែននៅដើមឆ្នាំថ្មីនេះ ទោះយ៉ាងណា លោកស្រី​មាន​ទំនុក​ចិត្ត​យ៉ាង​ខ្លាំង​ថា អ៊ុយក្រែន​នឹង​ឈ្នះសង្គ្រាម​នៅ​ឆ្នាំ ២០២៣ នេះ ។

ពាក់ព័ន្ធនឹងបញ្ហានេះដែរ ក្រសួងការពារជាតិរុស្ស៊ីបាននិយាយកាលពីថ្ងៃអាទិត្យថា ការវាយប្រហារនៅថ្ងៃចូលឆ្នាំសកល បានផ្តោតលើទីតាំងផលិតយន្តហោះដ្រូនរបស់អ៊ុយក្រែន ដើម្បីការពារ​ការ​វាយ​ប្រហារ​ភេរវកម្ម​របស់​ក្រុង​កៀវ​ប្រឆាំង​នឹង​រុស្ស៊ី​នាពេល​ខាង​មុខ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងចំនួនទឹកប្រាក់ដែលលោកខាងលិចផ្ដល់ឲ្យ អ៊ុយក្រែន ចាប់តាំងពីផ្ទុះ​ការវាយលុករបស់ រុស្ស៊ី