កូឡុំប៊ី រឹបអូសឃ្លាំងអាវុធខ្នាតធំរបស់ក្រុមឧទ្ទាមទ័ពព្រៃ

ប៉ូលិសកូឡុំប៊ីបានរឹបអូសឃ្លាំងអាវុធដ៏ធំបំផុតក្នុងរយៈពេលប៉ុន្មានឆ្នាំចុងក្រោយនេះរបស់ក្រុមឧទ្ទាមទ័ពព្រៃកូឡុំប៊ី (FARC) នៅក្នុងនាយកដ្ឋាន Narino នៅភាគនិរតីរបស់ប្រទេស ។

មេប៉ូលិសកូឡុំប៊ីលោក Henry Armando Sanabria បានប្រាប់សារព័ត៌មានថា អាជ្ញាធររឹបអូសបានកាំភ្លើងចំនួន ៣៣ ដើម, កាំភ្លើងយន្ត M-60 មួយដើម, កាំភ្លើងខ្លីចំនួន ៣ ដើម, គ្រាប់បែកដៃចំនួន ២ គ្រាប់ និងគ្រាប់កាំភ្លើងជាង ៣០,០០០ គ្រាប់ ព្រមទាំងទូរស័ព្ទមានអង់តែនចំនួន ២ គ្រឿង ដែលសុទ្ធតែជារបស់ក្រុមឧទ្ទាមទ័ពព្រៃ FARC ។

លោក Sanabria បញ្ជាក់ថា ឃ្លាំងអាវុធដែលត្រូវបានរឹបអូសនេះ គឺជាការឆ្មក់បង្រ្កាបបានដ៏សំខាន់បំផុតមួយក្នុងប៉ុន្មានឆ្នាំថ្មីៗនេះ ដែលវាជួយរារាំងការពង្រឹងសមត្ថភាពរបស់ក្រុមឧទ្ទាម FARC ។

ការរឹបអូសអាវុធនេះបានកើតឡើង បន្ទាប់ពីប៉ូលិសរកឃើញរថយន្ត ២ គ្រឿងចតទុកចោលនៅលើផ្លូវហាយវ៉េ Pan-American ហើយនៅខាងក្នុងរថយន្តគេ​បានរកឃើញអាវុធនៅក្បែរអាវកាក់ និងខ្សែដៃដែលមានស្លាកសញ្ញា Columna Movil Jaime Martínez-FARC EP ។

ប៉ូលិសកំពុងព្យាយាមបញ្ជាក់ថាតើអាវុធនេះត្រូវបានទិញនៅលើទីផ្សារងងឹត ឬត្រូវបានលួចពីប៉ូលិស និងកងកម្លាំងយោធាក្នុងរូបភាពផ្សេងៗគ្នាក្នុងរយៈពេលជាច្រើនឆ្នាំមកនេះ ដោយគ្រាន់តែនៅក្នុងឆ្នាំ ២០២២ ប៉ូលិសកូឡុំប៊ី រឹបអូសបានអាវុធជាង ១៥,០០០ ខណៈដែលអាវុធចំនួន ៣៤៥ ប្រភេទទៀតត្រូវបានរឹបអូសរហូតមកដល់ឆ្នាំ ២០២៣​ នេះ ។

គួរបញ្ជាក់ថា នៅឆ្នាំ ២០១៦ រដ្ឋាភិបាលកូឡុំប៊ី បានចុះកិច្ចព្រមព្រៀងសន្តិភាពជាមួយក្រុមទ័ពព្រៃ FARC ប៉ុន្តែ អំពើហិង្សាបាញ់បោះនៅតែកើតមានដដែល ។ មិនតែប៉ុណ្ណោះ ក្រុម FARC ​និយាយ​ថា ពួកគេមិន​បញ្ឈប់​សកម្មភាពណាមួយឡើយ ហើយ​នឹង​បន្ត​ការ​ប្រយុទ្ធជានិច្ចជាមួយរដ្ឋាភិបាលលកូឡុំប៊ី ៕

ប្រែសម្រួលដោយ៖ នាង រតនៈ

ប្រភព ៖ Anadolu

ចុចអាន ៖ ដឹងទេ យន្តហោះដែលធ្លាក់នៅ នេប៉ាល់ មានអាយុកាលប៉ុន្មានឆ្នាំ?