កូឡុំប៊ី និង អាមេរិក បង្ហាញកាយវិការល្អូកល្អិនក្រោយទើបបោះសម្ដីឌឺដងគ្នាទៅមក

ប្រធានាធិបតីកូឡុំប៊ី Gustavo Petro កាលពីថ្ងៃទី ៣ ខែកុម្ភៈ បានធ្វើទស្សនកិច្ចនៅឯសេតវិមាន ដោយបង្ហាញពីកិច្ចខិតខំប្រឹងប្រែង ដើម្បីបន្ធូរបន្ថយភាពតានតឹងផ្នែកការទូតដ៏ខ្លាំងក្លាអស់រយៈពេលជាច្រើនខែ និងបន្ទាប់ពី ដូណាល់ ត្រាំ ប្រកាសថា លោកអាចប្រឈមមុខនឹងជោគវាសនាស្រដៀងគ្នាទៅនឹង អតីតមេដឹកនាំវ៉េណេស៊ុយអេឡា នីកូឡាស ម៉ាឌូរ៉ូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន france24. នៅក្នុងកិច្ចប្រជុំទល់មុខគ្នា ប្រធានាធិបតីកូឡុំប៊ីបានជួបជាមួយប្រធានាធិបតីអាមេរិក ប្រហែលពីរម៉ោង។ យ៉ាងណា សេតវិមានមិនបានរៀបចំពិធីស្វាគមន៍ដ៏ឧឡារិកដូចមេដឹកនាំបរទេសដទៃទៀតទេ ហើយប្រព័ន្ធផ្សព្វផ្សាយក៏មិនត្រូវបានអនុញ្ញាតឲ្យចូលរួមកិច្ចប្រជុំនោះដែរ។

ឆ្លើយតបទៅនឹងសំណួរអំពីថា តើមេដឹកនាំទាំងពីរនឹងឈានដល់កិច្ចព្រមព្រៀងដើម្បីបញ្ឈប់លំហូរគ្រឿងញៀនពីកូឡុំប៊ីដែរឬទេ លោកត្រាំបាននិយាយថា ភាគីទាំងពីរកំពុងធ្វើការលើបញ្ហានេះ «ពួកយើងកំពុងដោះស្រាយបញ្ហាជាមួយគ្នា និងចុះសម្រុងគ្នាយ៉ាងល្អ។ ខ្ញុំ និងគាត់មិនមែនជាមិត្តភក្តិជិតស្និទ្ធនោះទេ ហើយក៏មិនមានអារម្មណ៍អាក់អន់ចិត្តដែរ ព្រោះខ្ញុំមិនដែលជួបគាត់ពីមុនមកទេ ហើយខ្ញុំមិនស្គាល់គាត់ច្បាស់ទាល់តែសោះ»។

ទន្ទឹមគ្នានោះដែរ លោក Petro បានបង្ហោះរូបថតរបស់មេដឹកនាំទាំងពីរកំពុងចាប់ដៃគ្នាទាំងញញឹម អមជាមួយសារបញ្ចាក់ពីអារម្មណ៍ដែលជួបលោកត្រាំថា «អ្វីដែលខ្ញុំមានអារម្មណ៍ ឬបានឃើញនៅក្នុងប្រព័ន្ធផ្សព្វផ្សាយ ដែលហាក់ដូចជាផ្ទុយនឹងទស្សនៈរបស់ខ្ញុំ មិនបានកើតឡើងក្នុងអំឡុងពេលកិច្ចប្រជុំនៅសេតវិមានទេ។ ខ្ញុំគិតថាភាពខុសគ្នាមានច្រើនជាងនៅក្នុងមន្ត្រីផ្សេងទៀត មិនមែននៅក្នុងលោកត្រាំទេ»។

នៅក្នុងជំនួបដដែលនោះ លោកបានស្នើសុំឲ្យអាមេរិកជួយក្នុងការចាប់ខ្លួនមេក្លោងគ្រឿងញៀនដ៏ល្បីល្បាញដែលរស់នៅក្រៅប្រទេសកូឡុំប៊ី។ លើសពីនេះ លោកក៏ចង់ឲ្យមេដឹកនាំអាមេរិក សម្របសម្រួលជម្លោះការទូតរវាងកូឡុំប៊ី និងប្រទេសជិតខាងអេក្វាឌ័រផងដែរ។

នៅក្នុងរយៈពេលប៉ុន្មានខែថ្មីៗនេះ ត្រាំមានទំនាក់ទំនងឡើងចុះជាមួយលោក Petro ដែលត្រូវបានជ្រើសរើសជាប្រធានាធិបតីកូឡុំប៊ីក្នុងឆ្នាំ ២០២២។ នៅក្នុងខែតុលា ឆ្នាំ ២០២៥ មេដឹកនាំអាមេរិកបានចោទប្រកាន់លោកប្រធានាធិបតី Petro ថាជា «មេក្លោងគ្រឿងញៀន» ទោះបីជាលោកមិនបានផ្តល់ភស្តុតាងក៏ដោយ។ ប្រធានាធិបតីអាមេរិកកាលពីខែមុន បានលើកឡើងពីលទ្ធភាពនៃសកម្មភាពយោធាប្រឆាំងនឹងកូឡុំប៊ី ពីព្រោះប្រទេសនេះមិនគ្រប់គ្រងការជួញដូរគ្រឿងញៀន។

ក្រោយមក ភាគីលោក Petro ក៏រិះគន់លោកត្រាំយ៉ាងខ្លាំងម្តងហើយម្តងទៀត ដោយហៅការវាយឆ្មក់របស់អាមេរិកលើទូកដែលសង្ស័យថាជាគ្រឿងញៀននៅសមុទ្រថាជា «ឧក្រិដ្ឋកម្មសង្គ្រាម» និងពិពណ៌នាអំពីការចាប់ខ្លួនប្រធានាធិបតីវ៉េណេស៊ុយអេឡាលោក នីកូឡាស ម៉ាឌូរ៉ូ ថាជា «ការចាប់ជំរិត»៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កិច្ចពិភាក្សារវាងអាមេរិក-អ៊ីរ៉ង់ គ្រោងធ្វើនៅចុងសប្តាហ៍ ក្រោយទើបបោះសម្ដីធ្ងន់ឲ្យគ្នាទៅមក