រុស្ស៊ី ថា ជម្លោះនៅ អ៊ុយក្រែន តែ អាមេរិក ជាអ្នកទទួលផលចំណេញ

អនុរដ្ឋមន្ត្រីការបរទេសរុស្ស៊ីលោក Sergey Ryabkov បានប្រាប់សារព័ត៌មាន Sputnik ថា សហរដ្ឋអាមេរិកកំពុងទទួលបានផលចំណេញយ៉ាងច្រើនពីជម្លោះអ៊ុយក្រែន ជាពិសេសពីការផ្គត់ផ្គង់អាវុធរបស់បណ្តាប្រទេសអ៊ឺរ៉ុបដល់ទីក្រុងកៀវ ។

លោក Ryabkov បាននិយាយថា “វាច្បាស់ណាស់ សហរដ្ឋអាមេរិកមិនត្រឹមតែជាអ្នកដឹកនាំដ៏សំខាន់នៅក្នុងវិបត្តិអ៊ុយក្រែនប៉ុណ្ណោះទេ ប៉ុន្តែក៏ជាអ្នកទទួលផលចំណេញផងដែរ ។ ក្នុងចំណោមរឿងផ្សេងទៀត ទីក្រុងវ៉ាស៊ីនតោនបានចាត់ទុកអ៊ុយក្រែន គឺជាកន្លែងហ្វឹកហាត់សម្រាប់សាកល្បងអាវុធ និងសាកល្បងវិធីថ្មីនៃសង្រ្គាមរបស់ពួកគេ” ។

លោកបានបន្ថែមថា ទីក្រុងវ៉ាស៊ីនតោនក៏នឹងដាក់កិច្ចសន្យាថ្មីក្នុងទំហំទឹកប្រាក់រាប់ពាន់លានដុល្លារលើអឺរ៉ុបសម្រាប់ការទិញផលិតផលឧស្សាហកម្មយោធារបស់អាមេរិក ។ ប៉ុន្តែទោះជាយ៉ាងណាលោក Ryabkov បានព្រមានថា “អ្នកពាក់ព័ន្ធជាមួយនឹងហ្គេមមួយនេះ នឹងឃើញខ្លួនឯងរងគ្រោះយ៉ាងធ្ងន់ធ្ងរ ។

ជាចុងក្រោយលោក Sergey Ryabkov បានបញ្ជាក់ថា បន្ទាប់ពីទីក្រុងវ៉ាស៊ីនតោនបានប្រកាសការសម្រេចចិត្តក្នុងការបញ្ជូនរថក្រោះប្រយុទ្ធ Abrams ទៅកាន់អ៊ុយក្រែន ទីក្រុងមូស្គូមិនឃើញមធ្យោបាយណាមួយដើម្បីជួបពិភាក្សាជាមួយទីក្រុងកៀវទៀតនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ចោទ អាមេរិក និងណាតូ យក អ៊ុយក្រែន ជាកន្លែងដើម្បីសាកល្បងអាវុធថ្មីៗ