អាជ្ញាធរសុខាភិបាលនៅខេត្តស៊ីឈួន ភាគនិរតីប្រទេសចិន នឹងអនុញ្ញាតឲ្យបុគ្គលដែលមិនទាន់រៀបការ អាចមានគ្រួសារនិងចិញ្ចឹមបីបាច់កូនបាន។ នេះជាកិច្ចខិតខំប្រឹងប្រែងចុងក្រោយបង្អស់ ដើម្បីជំរុញអត្រាកំណើតដែលកំពុងធ្លាក់ចុះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមច្បាប់បច្ចុប្បន្ន រដ្ឋាភិបាលកំណត់ថា មានតែស្ត្រីរៀបការហើយប៉ុណ្ណោះ ដែលត្រូវបានអនុញ្ញាតឲ្យសម្រាលកូន ប៉ុន្តែដោយសារតែអត្រាអាពាហ៍ពិពាហ៍ និងកំណើត មានការធ្លាក់ចុះដល់កម្រិតទាបក្នុងរយៈពេលប៉ុន្មានឆ្នាំចុងក្រោយនេះ អាជ្ញាធរខេត្តបានកែប្រែច្បាប់ឆ្នាំ២០១៩ ដើម្បីផ្តល់អត្ថប្រយោជន៍ដល់អ្នកនៅលីវដែលចង់មានកូន។

ចាប់ពីថ្ងៃទី១៥ខែកុម្ភៈឆ្នាំ២០២៣ទៅ គូស្វាមីភរិយាដែលរៀបការហើយ និងបុគ្គលណាដែលចង់បានកូនចៅ នឹងត្រូវបានអនុញ្ញាតឲ្យចុះឈ្មោះជាមួយរដ្ឋាភិបាលក្នុងខេត្តដែលមានប្រជាជនច្រើនជាងគេលំដាប់ទីប្រាំរបស់ចិនមួយនេះ។

ស្របពេលជាមួយគ្នានោះ គណៈកម្មការសុខាភិបាលខេត្តស៊ីឈួន បាននិយាយនៅក្នុងសេចក្តីថ្លែងការណ៍មួយលើគេហទំព័ររបស់ខ្លួនថា វិធានការនេះ មានគោលបំណងលើកកម្ពស់ការអភិវឌ្ឍប្រជាជនរយៈពេលវែង និងប្រកបដោយតុល្យភាព។

កាលពីឆ្នាំមុន ចំនួនប្រជាជនរបស់ប្រទេសចិន បានធ្លាក់ចុះជាលើកដំបូងក្នុងរយៈពេលប្រាំមួយទសវត្សរ៍ ដែលជាហេតុជំរុញឲ្យអាជ្ញាធរ ដាក់ចេញនូវវិធានការលើកទឹកចិត្ត និងវិធានការជំរុញចំនួនប្រជាជន។

ការធ្លាក់ចុះនៃប្រជាសាស្រ្តរបស់ប្រទេសចិន ភាគច្រើនគឺកើតចេញពីគោលនយោបាយកូនតែមួយរបស់ខ្លួន ដែលបានដាក់នៅចន្លោះឆ្នាំ១៩៨០ដល់ឆ្នាំ២០១៥៕

ប្រែសម្រួល៖ Vann Vann

ប្រភព៖ Reuters

ចុចអាន៖ ៣ខែទៀត ឥណ្ឌា នឹងវ៉ាដាច់ ចិន ក្លាយជា ប្រទេសមានប្រជាជនច្រើនជាងគេបំផុត លើពិភពលោក