ណាតូព្រមាន! ជ័យជម្នះរបស់លោកពូទីន នៅអ៊ុយក្រែន នឹងផ្តល់សញ្ញាដល់ ចិន ថា គោលដៅអាចសម្រេចបានដោយប្រើ កម្លាំងសាហាវ

អគ្គលេខាធិការអង្គការ ណាតូ លោក Jens Stoltenberg កាលពីថ្ងៃអង្គារទី៣១ខែមករាបានព្រមានថា ជ័យជម្នះរបស់រុស្ស៊ីនៅក្នុងសង្គ្រាម ដែលខ្លួនបានចាប់ផ្តើមប្រឆាំងអ៊ុយក្រែន នឹងផ្ញើសារដ៏គ្រោះថ្នាក់ទៅកាន់របបផ្តាច់ការនៅជុំវិញពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីជប៉ុន លោក Fumio Kishida ថា “ទីក្រុងប៉េកាំង និងមូស្គូ កំពុងដឹកនាំការរុញច្រានភាពផ្តាច់ការប្រឆាំងនឹងសណ្តាប់ធ្នាប់ផ្អែកលើច្បាប់អន្តរជាតិ។ តំបន់ឥណ្ឌូប៉ាស៊ីហ្វិក កំពុងជួបប្រទះនឹងបញ្ហាប្រឈមកាន់តែខ្លាំងឡើង ចាប់ពីអាកប្បកិរិយាបង្ខិតបង្ខំរបស់ចិន រហូតដល់ការបង្កហេតុរបស់កូរ៉េខាងជើង”។

ស្របពេលជាមួយគ្នានោះ លោកបានបញ្ជាក់ថា សង្គ្រាមលុកលុយរបស់រុស្ស៊ី ប្រឆាំងនឹងអ៊ុយក្រែន មិនត្រឹមតែជាវិបត្តិសម្រាប់អឺរ៉ុបប៉ុណ្ណោះទេ ថែមទាំងជាបញ្ហាប្រឈមចំពោះសណ្តាប់ធ្នាប់ពិភពលោកផងដែរ។

ប្រមុខអង្គការណាតូរូបនេះនិយាយថា “ប្រសិនបើលោកប្រធានាធិបតី ពូទីន ឈ្នះនៅអ៊ុយក្រែនមែននោះ នេះនឹងផ្ញើសារថា របបផ្តាច់ការ អាចសម្រេចបាននូវគោលដៅរបស់ពួកគេ តាមរយៈកម្លាំងដ៏សាហាវ។ នេះគឺមានគ្រោះថ្នាក់ណាស់ព្រោះ ទីក្រុងប៉េកាំងកំពុងឃ្លាំមើលយ៉ាងយកចិត្តទុកដាក់ ហើយរៀនមេរៀនដែលអាចមានឥទ្ធិពលលើការសម្រេចចិត្តនាពេលអនាគតរបស់ខ្លួន។ អ្វីដែលកំពុងកើតឡើងនៅអឺរ៉ុបថ្ងៃនេះ អាចកើតឡើងនៅអាស៊ីបូព៌ាថ្ងៃស្អែក ដូច្នេះ យើងត្រូវតែរួបរួមនិងរឹងមាំ ឈររួមគ្នាដើម្បីសេរីភាពនិងលទ្ធិប្រជាធិបតេយ្យ”។

ចាប់តាំងពីរុស្ស៊ី វាយលុកអ៊ុយក្រែនកាលពីខែកុម្ភៈឆ្នាំមុនមក ប្រធានបទនៃការលុកលុយរបស់ចិនលើតៃវ៉ាន់ បានក្លាយជាចំណុចក្តៅនៃកិច្ចពិភាក្សាឥតឈប់ឈរ ក្នុងចំណោមមេដឹកនាំ និងមន្ត្រីកំពូលៗនៅទូទាំងពិភពលោក។

ដំណើរទស្សនកិច្ចទៅកាន់កោះតៃវ៉ាន់ដោយប្រធានសភាអាមេរិកលោកស្រី Nancy Pelosi កាលពីខែសីហាឆ្នាំមុន បានជំរុញឲ្យមានសមយុទ្ធយោធាចិននៅជិតកោះដែលគ្រប់គ្រងដោយលទ្ធិប្រជាធិបតេយ្យ ជាហេតុនាំឲ្យមានក្តីព្រួយបារម្ភអំពីសក្តានុពលសម្រាប់ការវាយលុក។

សកម្មភាពយោធារបស់ចិននៅតែបន្ត ហើយថ្មីៗនេះ ឧត្តមសេនីយ៍ទ័ពអាកាសអាមេរិកម្នាក់បានលើកឡើងថា ការប្រយុទ្ធមួយអាចផ្ទុះឡើងលើកោះតៃវ៉ាន់នៅដើមឆ្នាំ ២០២៥៕

ប្រែសម្រួល៖ Vann Vann

ប្រភព៖ Business Insider

ចុចអាន៖ ប្រមុខ ណាតូ ថា ចិន ជាប្រទេសបង្កបញ្ហាប្រឈមដ៏ធំ ចំពោះសម្ព័ន្ធភាពនេះ