ក្រុមរដ្ឋមន្ត្រីការបរទេស អាស៊ាន ប្ដេជ្ញាប្រឹងប្រែងសម្រេច “កិច្ចសន្ទនាថ្នាក់ជាតិរួម” នៅក្នុងប្រទេសមីយ៉ាន់ម៉ា

ក្រុមរដ្ឋមន្ត្រីការបរទេសអាស៊ាន នៅថ្ងៃចុងក្រោយនៃកិច្ចប្រជុំរយៈពេល ២ ថ្ងៃនៅប្រទេសឥណ្ឌូណេស៊ី បានព្រមព្រៀងធ្វើការដើម្បីសម្រេចបាន “កិច្ចសន្ទនាថ្នាក់ជាតិរួម” នៅក្នុងប្រទេសមីយ៉ាន់ម៉ា ។

សេចក្តីថ្លែងការណ៍មួយបាននិយាយថា កិច្ចសន្ទនាថ្នាក់ជាតិរួមដែលមានការចូលរួមពីភាគីពាក់ព័ន្ធទាំងអស់ គឺជាគន្លឹះក្នុងការស្វែងរកដំណោះស្រាយដោយសន្តិវិធីនៅក្នុងប្រទេសដែលកំពុងមានភាពចលាចល បើទោះបីជាមីយ៉ាន់ម៉ាមិនបានចូលរួមក៏ដោយ ។

ទន្ទឹមនោះ ឥណ្ឌូណេស៊ីក្នុងនាមជាម្ចាស់ផ្ទះបានរំលឹកឡើងវិញពីសារៈសំខាន់នៃការអនុវត្តកិច្ចព្រមព្រៀងជាឯកច្ឆន្ទ ៥ ចំណុចរបស់មីយ៉ាន់ម៉ា ដែលបានព្រមព្រៀងគ្នានៅឆ្នាំ ២០២១ ។ ផែនការសន្តិភាពនោះអំពាវនាវឲ្យយោធាមីយ៉ាន់ម៉ាបញ្ឈប់ជាបន្ទាន់ចំពោះអំពើហិង្សា និងបញ្ជូនបេសកជនពិសេសទៅសម្របសម្រួលកិច្ចសន្ទនារវាងក្រុមគាំទ្រលទ្ធិប្រជាធិបតេយ្យ និងក្រុមយោធា ។

គួរបញ្ជាក់ថា ភាពចលាចលនយោបាយនៅតែបន្តកើតមានក្នុងប្រទេសមីយ៉ាន់ម៉ា ខណៈកាលពីថ្ងៃទី១ ខែកុម្ភៈនេះ គឺជាខួប ២ ឆ្នាំហើយ ចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យកាលពីឆ្នាំ ២០២១ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រដ្ឋមន្ត្រីការបរទេស អាស៊ាន បន្តផ្ដោតសំខាន់លើ មីយ៉ានម៉ា ខណៈរដ្ឋប្រហារឈាន​ដល់ខួប ២ ឆ្នាំ