រដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ (អាស៊ាន) កាលពីថ្ងៃសុក្របានចាប់ផ្តើមកិច្ចពិភាក្សានៅក្នុងប្រទេសឥណ្ឌូណេស៊ី ខណៈដែលប្រធានបទ គឺនៅតែផ្តោតលើភាពចលាចលដែលកំពុងបន្តនៅក្នុងប្រទេសមីយ៉ាន់ម៉ា ។

កិច្ចប្រជុំរយៈពេល ២ ថ្ងៃនៅទីក្រុងហ្សាកាតានឹងផ្តោតទៅលើរបៀបដែលប្រទេសជាសមាជិក អាចជំរុញយោធាមីយ៉ាន់ម៉ា ឲ្យអនុវត្តកិច្ចព្រមព្រៀងជាឯកច្ឆន្ទ ៥ ចំណុច ។

ប៉ុន្តែ​ទោះជាយ៉ាងណាក៏មាន​ជំហរ​ខុស​គ្នា​ក្នុង​ចំណោម​សមាជិក​អាស៊ានផងដែរ ដោយក្នុងនោះ ឥណ្ឌូណេស៊ី និងសិង្ហបុរីបានប្រកាន់ជំហររឹងប៉ឹងប្រឆាំងនឹងយោធាមីយ៉ាន់ម៉ា ខណៈដែលថៃ និងកម្ពុជា ជំរុញឲ្យមានការផ្សះផ្សាបន្ថែមទៀត ។

កិច្ចព្រមព្រៀងជាឯកច្ឆន្ទ ៥ ចំណុច នេះអំពាវនាវឲ្យយោធាមីយ៉ាន់ម៉ាបញ្ឈប់ជាបន្ទាន់ចំពោះអំពើហិង្សាក្នុងប្រទេស ហើយបញ្ជូនបេសកជនពិសេសមួយរូប ដើម្បីសម្របសម្រួលកិច្ចសន្ទនារវាងក្រុមគាំទ្រលទ្ធិប្រជាធិបតេយ្យ និងក្រុមយោធា ខណៈយោធាក៏បានយល់ព្រមលើផែនការនេះហើយផងដែរ កាលពីឆ្នាំ ២០២១ ប៉ុន្តែច្បាស់ណាស់វាមិនដំណើរការនោះទេ ។

គួរបញ្ជាក់ថា ភាពចលាចលនយោបាយនៅតែបន្តកើតមានក្នុងប្រទេសមីយ៉ាន់ម៉ា ខណៈកាលពីថ្ងៃទី១ ខែកុម្ភៈនេះ គឺជាខួប ២ ឆ្នាំហើយ ចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតតាមបែបប្រជាធិបតេយ្យកាលពីឆ្នាំ ២០២១ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Zelensky ថា អ៊ុយក្រែន ឈ្នះ ឬចាញ់ រុស្ស៊ី គឺពឹងលើអឺរ៉ុប