ចិន បណ្តេញប្រធានសេវាអាកាសធាតុជាតិ ចេញពីតំណែង ក្រោយបាឡុងហោះចូលដែនអាកាសអាមេរិក (មានវីដេអូ)

ប្រទេសចិន បានបញ្ចប់តំណែងប្រធានសេវាអាកាសធាតុជាតិរបស់ខ្លួន កាលពីថ្ងៃអាទិត្យទី៥ខែកុម្ភៈ នៅក្នុងទង្វើមួយដែលត្រូវបានគេមើលឃើញថា ជាកិច្ចខិតខំប្រឹងប្រែងដើម្បីបញ្ជាក់ពីការអះអាងរបស់ខ្លួនដែលថា បាឡុងនៅសហរដ្ឋអាមេរិក គឺជាបាឡុងហោះខុសផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងប៉េកាំង បានប្រកាសពីការបណ្តេញលោក Zhuang Guotai កាលពីថ្ងៃអាទិត្យ ពោលគឺប៉ុន្មានម៉ោងមុនពេលសហរដ្ឋអាមេរិក បាញ់ទម្លាក់បាឡុងនៅឆ្នេរសមុទ្រនៃរដ្ឋ South Carolina។

អាមេរិក​កំពុង​ធ្វើ​ការ​ ដើម្បី​យក​បាឡុង​មក​ពិនិត្យ ប៉ុន្តែទី​ក្រុង​ប៉េកាំង​បាន​ប្រកែក​ថា ខ្លួន​គ្មាន​កំហុសឡើយ ហើយ​វត្តមាន​របស់បាឡុង​នៅ​ក្នុង​ដែន​អាកាស​អាមេរិក គឺ​ជា​ឧបទ្ទវហេតុ។

ក្រសួងការបរទេសចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា “បន្ទាប់ពីការផ្ទៀងផ្ទាត់ ភាគីចិន បានជូនដំណឹងម្តងហើយម្តងទៀតអំពីលក្ខណៈស៊ីវិលរបស់បាឡុងដល់ភាគីអាមេរិក ហើយបានបង្ហាញថា ការចូលទៅក្នុងទឹកដីសហរដ្ឋអាមេរិកគឺដោយសារតែមានឧបទ្ទវហេតុដែលនឹកស្មានមិនដល់”។

ទោះបីជាយ៉ាងណាក៏ដោយ ប្រទេស​ចិន​បាន​ថ្កោលទោស​ការសម្រេចចិត្ត​របស់​អាមេរិក​ ក្នុងការ​បាញ់​ទម្លាក់បាឡុងនោះ​ថា​ជា “​ប្រតិកម្មហួសហេតុ” កាលពី​ថ្ងៃអាទិត្យ​។

ក្រសួងការបរទេសក្នុងទីក្រុងប៉េកាំងនិយាយថា “ប្រទេសចិនមិនយល់ព្រមទេចំពោះរឿងនេះ ហើយសូមប្រឆាំងទៅនឹងការវាយប្រហារដោយកម្លាំងរបស់សហរដ្ឋអាមេរិក លើយានស៊ីវិលគ្មានមនុស្សបើក”។

ក្រសួងបន្ថែមថា “ក្រោមកាលៈទេសៈបែបនេះ ការប្រើប្រាស់កម្លាំងរបស់សហរដ្ឋអាមេរិក គឺជាប្រតិកម្មហួសហេតុ និងជាការបំពានយ៉ាងធ្ងន់ធ្ងរលើការអនុវត្តអន្តរជាតិ។ ប្រទេសចិននឹងការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ស្របច្បាប់របស់ក្រុមហ៊ុនពាក់ព័ន្ធ ហើយរក្សាសិទ្ធិក្នុងការឆ្លើយតបបន្ថែមទៀតប្រសិនបើចាំបាច់”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ FOX

ចុចអាន៖ ប្រធាន សភា អាមេរិក ចោទ ចិន ថា មិន យក ចិត្ត ទុក ដាក់ ចំពោះ អធិបតេយ្យភាពរបស់ខ្លួន