អាមេរិក រកឃើញឧបករណ៍ទំនើប សម្រាប់យកការណ៍ នៅក្នុងបាឡុងចិន (មានវីដេអូ)

រដ្ឋាភិបាលអាមេរិក បាននិយាយនៅថ្ងៃសុក្រទី០៩ខែកុម្ភៈថា បាឡុងចារកម្មរបស់ចិន ដែលអាមេរិកបាញ់ទម្លាក់លើមហាសមុទ្រអាត្លង់ទិកកាលពីចុងសប្តាហ៍មុន គឺផ្ទុកឧបករណ៍បច្ចេកវិទ្យាទំនើប ដែលមានសមត្ថភាពប្រមូលសញ្ញាទាក់ទង និងព័ត៌មានរសើបផ្សេងៗទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍របស់មន្ត្រីជាន់ខ្ពស់ក្រសួងការបរទេស, ច្បាស់ណាស់ បាឡុងនេះ មានឧបករណ៍សម្រាប់ការស៊ើបការណ៍សម្ងាត់ រួមទាំងអង់តែនយ៉ាងច្រើន ដែលទំនងជាមានសមត្ថភាពប្រមូល និងទំនាក់ទំនងតាមទីតាំងភូមិសាស្ត្រនានាផងដែរ។

មន្ត្រីដដែលនិយាយថា បាឡុងនេះ ទំនងជាផ្នែកមួយនៃកម្មវិធីចារកម្មលើអាកាសដ៏ធំ ដែលប្រតិបត្តិការដោយយោធាចិន ហើយបានកំណត់គោលដៅនៅប្រទេសជាង១០ លើទ្វីបចំនួន៥។

ស្របពេលជាមួយគ្នានោះ ក្រុមមន្ត្រី FBI ដែលចូលរួមក្នុងប្រតិបត្តិការរុករក និងពិនិត្យព័ស្តុតាងពីបាឡុងបាននិយាយនៅថ្ងៃសុក្រថា សម្ភារជាច្រើននៅតែស្ថិតក្នុងទឹក ហើយនឹងតម្រូវឲ្យក្រុមអ្នកមុជទឹកមកពីការិយាល័យនេះ និងកងទ័ពជើងទឹកអាមេរិក ប្រមូលឡើងគោក។

ទោះបីជាយ៉ាងណាក៏ដោយ ប្រតិបត្តការនេះ អាចត្រូវបានរំខានដោយសារបញ្ហាអាកាសធាតុ។

នៅទីក្រុងប៉េកាំង មុនពេលសហរដ្ឋអាមេរិកផ្តល់ព័ត៌មានថ្មី, អ្នកនាំពាក្យក្រសួងការបរទេសចិន លោកស្រី Mao Ning បានទទូចម្តងហើយម្តងទៀតថា នេះជាបាឡុងឧតុនិយមស៊ីវិល ដែលបានហោះខុសផ្លូវ ហើយថា សហរដ្ឋអាមេរិកប្រតិកម្មខ្លាំងពេក ដោយការបាញ់ទម្លាក់វា។

លោកស្រី Mao បន្ត​ថា “​វា​ជា​ភាពគ្មានទំនួល​ខុស​ត្រូវ។ ការ​ចោទ​ប្រកាន់​ចុង​ក្រោយ​នេះ អាច​ជា​ផ្នែក​មួយ​នៃ​សង្គ្រាម​ព័ត៌មាន​របស់​ភាគី​អាមេរិក​ប្រឆាំង​នឹង​ប្រទេស​ចិន”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CBS

ចុចអាន៖ អាមេរិក និយាយថា ចិន បានបង្ហោះបាឡុងជាច្រើន លើទ្វីបចំនួន ៥ឯណោះ