អ្នកនៅរស់ពីការរញ្ជួយដីតួកគី កំពុងប្រឈមនឹងគ្រោះថ្នាក់ដល់ជីវិតមួយទៀត

បុគ្គលិកសង្គ្រោះម្នាក់បានព្រមានថា មនុស្សនឹងស្លាប់ដោយសារជំងឺ បន្ទាប់ពីហេដ្ឋារចនាសម្ព័ន្ធមូលដ្ឋានតួកគី ត្រូវបានបំផ្លាញដោយគ្រោះរញ្ជួយដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសុខាភិបាលតួកគីលោក Fahrettin Koca និយាយថា វ៉ាក់សាំងការពារជំងឺឆ្កែឆ្កួត និងតេតាណូស ត្រូវបានបញ្ជូនទៅកាន់តំបន់រញ្ជួយដីរួចហើយ។

យោងតាមរដ្ឋមន្ត្រីរូបនេះ, ឱសថស្ថានចល័តបានចាប់ផ្តើមដំណើរការនៅទីនោះរួចហើយដែរកាលពីចុងសប្តាហ៍ ប៉ុន្តែអ្នករស់រានមានជីវិត កំពុងភ័យខ្លាចជំងឺ។

ចំណែក ពលរដ្ឋម្នាក់ឈ្មោះ Gizem ដែលរស់នៅក្នុងខេត្ត Sanliurfa ភាគអាគ្នេយ៍បាននិយាយថា “ប្រសិនបើមនុស្សមិនស្លាប់នៅទីនេះក្រោមគំនរបាក់បែកទេនោះ ពួកគេនឹងស្លាប់ដោយសាររបួស ហើយពួកគេនឹងស្លាប់ដោយសារជំងឺ។ មិនមានបង្គន់អនាម័យនៅទីនេះទេ វាជាបញ្ហាដ៏ធំ”។

ហើយបញ្ហានេះ ទំនងជានឹងកាន់តែធំនៅក្នុងប្រទេសស៊ីរី ខណៈអង្គការសុខភាពពិភពលោកបាននិយាយកាលពីថ្ងៃចន្ទទី១៣ខែកុម្ភៈថា ប្រព័ន្ធសុខភាពរបស់ប្រទេសនេះ ត្រូវទ្រុឌទ្រោម ដោយសារសង្គ្រាមស៊ីវិលអស់រយៈពេលជាច្រើនឆ្នាំរួចមកហើយ។

នាយកអង្គការនេះ លោក Tedros Adhanom Ghebreyesus បានលើកឡើងថា “វិបត្តិនៃជម្លោះ មេរោគកូវីដ ជំងឺអាសន្នរោគ ការធ្លាក់ចុះសេដ្ឋកិច្ច ហើយឥឡូវនេះការរញ្ជួយដីទៀត បានធ្វើឲ្យចំនួនមនុស្សស្លាប់កាន់តែច្រើនឡើងៗ”៕

ប្រែសម្រួល៖ Vann Vann

ប្រភព៖ SKY

ចុចអាន៖ កុមារកាន់តែច្រើន ត្រូវបានជួយសង្គ្រោះពីក្រោមគំនរថ្ម ក្រោយរយៈពេល ៦ថ្ងៃ