មេដឹកនាំ​ចិន​និង​បេឡារុស បានបង្ហាញចំណាប់អារម្មណ៍ ​ចំពោះ​ដំណោះស្រាយ​សន្តិភាព​នៅ​ប្រទេសអ៊ុយក្រែន។

ប្រធានាធិបតីចិន លោក ស៊ី ជីនពីង និងមេដឹកនាំបេឡារុស លោក Alexander Lukashenko ដែលជាសម្ព័ន្ធមិត្តជិតស្និទ្ធរបស់លោក វ្ល៉ាឌីមៀរ ពូទីន បានចេញសេចក្តីថ្លែងការណ៍មួយ បន្ទាប់ពីកិច្ចពិភាក្សានៅទីក្រុងប៉េកាំង។

លោក Lukashenko និយាយថា ប្រទេសរបស់លោកគាំទ្រយ៉ាងពេញទំហឹងចំពោះផែនការទីក្រុងប៉េកាំង សម្រាប់ការបញ្ចប់សង្រ្គាមនៅអ៊ុយក្រែន បន្ទាប់ពីប្រទេសចិន បានប្រកាសផែនការសម្រាប់កិច្ចចរចាសន្តិភាពកាលពីសប្តាហ៍មុន ដោយអំពាវនាវឲ្យមានការគោរពអធិបតេយ្យជាតិ។

ឯកសារ​១២​ចំណុចរបស់ចិន ​ជំរុញ​ឲ្យ​មាន​ការ​គោរព​ចំពោះអធិបតេយ្យ​នៃ​ប្រទេស​ទាំង​អស់។ ទោះបីជាយ៉ាងណាក៏ដោយ ឯកសារនោះ មិនបញ្ជាក់ច្បាស់ថាតើរុស្ស៊ីត្រូវតែដកកងទ័ពរបស់ខ្លួនចេញពីអ៊ុយក្រែននោះទេ ហើយបានថ្កោលទោសការប្រើប្រាស់ទណ្ឌកម្មឯកតោភាគី។

គួរបញ្ជាក់ថា ដំណើរ​ទស្សនកិច្ច​របស់លោក Lukashenko បាន​កើត​ឡើង​ប៉ុន្មាន​ថ្ងៃ ​បន្ទាប់​ពី​ប្រទេស​ចិន​ ​បញ្ជូន​អ្នក​ការទូត​កំពូល​របស់​ខ្លួន​គឺលោក Wang Yi ទៅ​ជួប​លោក ពូទីន។

លោក Lukashenko បានផ្តល់ជំនួយដល់មេដឹកនាំរុស្ស៊ី ក្នុងសង្គ្រាមនៅអ៊ុយក្រែន ហើយក្រុមអ្នកសង្កេតការណ៍មើលឃើញថា ដំណើររបស់លោកទៅកាន់ទីក្រុងប៉េកាំង គឺជាសញ្ញាមួយផ្សេងទៀតដែលថា ប្រទេសចិន កាន់តែស្និទ្ធស្នាលជាមួយរុស្ស៊ី និងសម្ព័ន្ធមិត្តរបស់ខ្លួន៕

ប្រែសម្រួល​៖ Vann Vann

ប្រភព៖ BBC

ចុចអាន៖ ពូទីន ចោទលោកខាងលិចថា ប្រើក្រុមជ្រុលនិយម ប្រឆាំងរុស្ស៊ី