ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយថា ប្រទេសលោកខាងលិចមិនដែលងាករេពីការប្រើក្រុមជ្រុលនិយមប្រឆាំងនឹងរុស្ស៊ីទេ ហើយពួកគេកំពុងធ្វើដូច្នេះទៀតក្នុងអំឡុងពេលមានជម្លោះនៅអ៊ុយក្រែន។ លោក​​អះអាង​ថា ចារកម្ម​បស្ចិមប្រទេស ​មាន​បំណង​បង្កើតក្រុមភេរវជន​នៅ​ក្នុង​ប្រទេស​រុស្ស៊ីឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកពូទីន បាននិយាយខណៈធ្វើជាប្រធានកិច្ចប្រជុំក្រុមប្រឹក្សានៃសេវាសន្តិសុខសហព័ន្ធរុស្ស៊ី (FSB) នៅទីក្រុងមូស្គូកាលពីថ្ងៃអង្គារទី២៨ខែកុម្ភៈថា ការប្រឆាំងនឹងការគំរាមកំហែងភេរវកម្មនេះនៅតែជាកិច្ចការបន្ទាន់សម្រាប់រុស្ស៊ី។

លោកនិយាយថា “​មួយ​ឆ្នាំ​កន្លង​ទៅ ចំនួន​នៃ​ឧក្រិដ្ឋកម្ម​បែប​នេះ ​បាន​កើន​ឡើង ដែល​ច្បាស់​ជា​ជាប់​ពាក់ព័ន្ធ​នឹង​ការ​ប៉ុនប៉ង​របស់​ទីក្រុងកៀវ ក្នុង​ការ​ប្រើ​វិធី​ភេរវកម្ម។ យើង​ដឹង​ច្បាស់​អំពី​រឿង​នោះ។ ពួកគេបានប្រើប្រាស់វានៅ Donbass អស់រយៈពេលជាយូរមកហើយ”។

លោកប្រធានាធិបតីបន្តថា ប្រទេសលោកខាងលិចដែលគាំទ្រទីក្រុងកៀវក្នុងជម្លោះប្រឆាំងនឹងទីក្រុងមូស្គូ មិនដែលងាករេពីការប្រើប្រាស់ទាំងរ៉ាឌីកាល់ និងក្រុមជ្រុលនិយមដើម្បីផលប្រយោជន៍របស់ពួកគេឡើយ បើទោះបីជាពួកគេធ្វើសេចក្តីថ្លែងការណ៍ខ្លាំងៗ អំពីការប្រយុទ្ធប្រឆាំងនឹងអំពើភេរវកម្មអន្តរជាតិក៏ដោយ។ ពួកគេតែងតែប្រើអ្វីដែលមាននៅក្នុងដៃ ប្រឆាំងនឹងយើង។ ពួកគេប្រើអ្វីគ្រប់យ៉ាងដែលអាចធ្វើទៅបាន។ វា​តែង​តែ​បែប​នេះ ហើយ​វា​នៅ​តែ​ដដែល”។

ស្របពេលជាមួយគ្នានោះ លោកបានព្រមានថា ចារកម្មលោកខាងលិច កំពុងធ្វើការប៉ុនប៉ងដ៏សកម្មនាពេលបច្ចុប្បន្ន ដើម្បីស្ដារកោសិកាភេរវករនៅក្នុងប្រទេសរុស្ស៊ីឡើងវិញ។

គួរបញ្ជាក់ជាថ្មី លោក ពូទីន ធ្លាប់បានស្តីបន្ទោសអ៊ុយក្រែនថា ប្រើប្រាស់ “កលល្បិចភេរវករ” បន្ទាប់ពីការផ្ទុះនៅលើស្ពាន គ្រីមៀ កាលពីដើមខែតុលា។

រឿងនោះ បានបង្កឲ្យមានការវាយប្រហារទ្រង់ទ្រាយធំដោយមីស៊ីលរបស់រុស្ស៊ីទៅលើហេដ្ឋារចនាសម្ព័ន្ធ និងគោលដៅយោធារបស់អ៊ុយក្រែន ដែលបណ្តាលឲ្យមានការដាច់ចរន្តអគ្គិសនីនៅទូទាំងប្រទេស និងធ្វើឲ្យខូចខាតយ៉ាងខ្លាំងដល់សមត្ថភាពការពារដែនអាកាសរបស់ទីក្រុងកៀវ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ពូទីន គូសបញ្ជាក់អំពីបញ្ហារបស់រុស្ស៊ី ជាមួយ អាមេរិក