ព័ត៌មានអន្ដរជាតិ

លោក Zelensky អះអាងថា ទ័ព អ៊ុយក្រែន កំពុងខ្វះអាវុធ ៤ ប្រភេទប្រើទប់ រុស្ស៊ី

បានផុស

៣ ខែ មុន

នៅ

ថ្ងៃសៅរ៍ ៤ មីនា ២០២៣

ដោយ

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃសុក្រថា កងកម្លាំងប្រដាប់អាវុធអ៊ុយក្រែនកំពុងខ្វះកាំភ្លើងធំ គ្រាប់រំសេវ យន្តហោះចម្បាំង និងរថក្រោះ ដើម្បីទប់ទល់នឹងប្រតិបត្តិការសឹករបស់រុស្ស៊ី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានរួមគ្នាជាមួយសមភាគីឡាតវីលោក Egils Levits នៅទីក្រុង Lvov, លោក Zelensky បានអះអាងថា អ៊ុយក្រែនកំពុងខ្វះខាតសព្វាវុធទាំងនេះ ដូច្នេះលោកខាងលិចត្រូវតែពន្លឿនការដឹកជញ្ជូនវាមកកាន់អ៊ុយក្រែន ។

លោក Zelensky បាននិយាយថា “កាំភ្លើងធំគឺជាវត្ថុលេខមួយដែលយើងត្រូវការ ហើយយើងក៏ត្រូវការគ្រាប់រំសេវក្នុងបរិមាណដ៏ច្រើនផងដែរ ។ អ៊ុយក្រែនត្រូវការកាំភ្លើងធំមិនមែនដើម្បីវាយប្រហារលើទឹកដីរុស្ស៊ីនោះទេ ប៉ុន្តែយើងត្រូវដណ្តើមយកតំបន់ដែលទីក្រុងកៀវ នៅតែបន្តចាត់ទុកជារបស់ខ្លួនមកវិញ ។

ដោយឡែកពាក់ព័ន្ធនឹងតម្រូវការរថក្រោះ និងយន្តហោះចម្បាំងវិញ លោក Zelensky បានលើកឡើងថា “យើងពិតជាត្រូវការអាវុធទាំងនេះ ហើយមិនមែនគ្រាន់តែនិយាយចោល ឬសន្យាខ្យល់នោះទេ” ។

លោក Zelenksy បានបញ្ជាក់ទៀតថា “កងទ័ពរបស់យើងទទួលបានការបណ្ដុះបណ្ដាលរួចហើយ ដូច្នេះរង់ចាំតែការដឹកជញ្ជូនអាវុធមកកាន់អ៊ុយក្រែន ហើយប្រើប្រាស់វាប៉ុណ្ណោះ មិនមែនគ្រាន់តែបង្ហាត់ហើយ ទុកពួកគេចោលនោះទេ” ។

គួរបញ្ជាក់ថា ប្រតិបត្តិការសឹករបស់រុស្ស៊ីដែលលោក វ្ល៉ាឌីមៀរ ពូទីន ប្រកាសបើកការលុកលុយលើអ៊ុយក្រែនកាលពីថ្ងៃទី២៤ ខែកុម្ភៈ ឆ្នាំ២០២២ បានអូសបន្លាយពេល ១ ឆ្នាំហើយ ខណៈរហូតមកដល់ពេលនេះ ក៏មិនទាន់មានសញ្ញាថមថយនៅឡើយផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ មកស្គាល់ យន្តហោះចម្បាំង F-16 ដ៏មានឥទ្ធិពលរបស់ អាមេរិក ដែល អ៊ុយក្រែន កំពុងទទូចចង់បាន