បក្សប្រឆាំងរុស្ស៊ី ព្រមានថា លោក ពូទីន មិនមែនគំរាមលេងៗទេ រឿងបាញ់នុយក្លេអ៊ែរ

យោងតាមលោក Grigory Yavlinsky ដែលជាអ្នកនយោបាយគណបក្សប្រឆាំងរុស្ស៊ី និងជាស្ថាបនិកនៃគណបក្សសេរីនិយម Yabloko បានឲ្យដឹងថា ការគំរាមកំហែងរបស់លោក វ្ល៉ាឌីមៀរ ពូទីន អំពីសង្គ្រាមនុយក្លេអ៊ែរគឺពិតប្រាកដ មិនមែននិយាយឲ្យរួចពីមាត់ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជាតិរុស្សីដើមកំណើតអ៊ុយក្រែន និងជាអ្នករិះគន់រដ្ឋាភិបាលលោក ពូទីន វ័យ៧០ឆ្នាំរូបនេះ បានប្រាប់កាសែត Newsweek កាលពីថ្ងៃអង្គារទី១៤ខែមីនាថា ការគំរាមកំហែងនុយក្លេអ៊ែររបស់លោក ពូទីន គឺជាការគំរាមកំហែងពិតប្រាកដ នេះមិនមែនគ្រាន់តែនិយាយឲ្យតែបានបាននោះទេ។

លោក​​ព្រមានទៀត​ថា រុស្ស៊ី​អាច​នឹង​ប្រើ​អាវុធ​នុយក្លេអ៊ែរ​របស់​ខ្លួន ប្រសិន​បើ​អ៊ុយក្រែន​ព្យាយាម​ដណ្តើម​យក​តំបន់ គ្រីមៀ​ មកវិញ។

លោក Yavlinsky ដែលកើតនៅទីក្រុង Lviv នៃប្រទេសអ៊ុយក្រែន បានឈរឈ្មោះប្រឆាំងនឹងលោក ពូទីន ក្នុងការបោះឆ្នោតប្រធានាធិបតីចំនួនបីអាណត្តិមកហើយ។

សេដ្ឋវិទូ និង​អ្នក​នយោបាយ​រូបនេះ បាន​សរសេរនូវ​ផែនការ​មួយ ​ដើម្បី​ផ្លាស់ប្តូរ​សហភាព​សូវៀត​ ឲ្យ​ទៅ​ជា​សេដ្ឋកិច្ច​ទីផ្សារ​សេរី។

លោកគឺជាអតីតមេដឹកនាំរបស់គណបក្ស Yabloko ដែលបានបង្កើតឡើងនៅឆ្នាំ១៩៩៣ ក្នុងនាមជាគណបក្សសង្គមសេរីនិយម នៅប្រទេសរុស្ស៊ី។

គួរបញ្ជាក់ថា លោក ពូទីន បានអះអាងជាច្រើនលើកមកហើយ ពីការត្រៀមខ្លួនរបស់រុស្ស៊ីក្នុងការប្រើប្រាស់អាវុធនុយក្លេអ៊ែរក្នុងជម្លោះជាមួយលោកខាងលិច។

កាលពីខែមុន លោកបានផ្អាកសន្ធិសញ្ញា New START ដែលជាកិច្ចព្រមព្រៀងគ្រប់គ្រងអាវុធនុយក្លេអ៊ែរផ្លូវការរវាងរុស្ស៊ី និងសហរដ្ឋអាមេរិក។

កាល​ពី​ខែ​មករា អតីតប្រធានាធិបតីរុស្ស៊ីលោក Dmitry Medvedev ក៏​បាន​ព្រមានដែរ​ថា បើរុស្ស៊ី​ចាញ់​សង្គ្រាម នោះ​អាច​បង្ក​ឲ្យ​មាន​ការ​ឆ្លើយ​តប​នុយក្លេអ៊ែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ពូទីន ចោទលោកខាងលិចថា ប្រើក្រុមជ្រុលនិយម ប្រឆាំងរុស្ស៊ី