រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃព្រហស្បតិ៍ថា នៅពេលនេះ សហរដ្ឋអាមេរិកពេញចិត្តក្នុងការផ្តល់អាវុធ និងឧបករណ៍យោធាដល់រដ្ឋាភិបាលទីក្រុងកៀវ ជាជាងផ្សះផ្សាទំនាក់ទំនងការទូតជាមួយរុស្ស៊ី ។

លោក Blinken បានលើកឡើងថា “ការផ្ដល់អាវុធឲ្យអ៊ុយក្រែន គឺដើម្បីឲ្យរដ្ឋាភិបាលទីក្រុងកៀវមានសន្តិភាពត្រឹមត្រូវ ពេញលេញ និងយូរអង្វែង ជាពិសេសយើងមិនចង់ឃើញប្រទេសរុស្ស៊ីម្ដងទៀតនៅ ២ ឬ ៣ ឆ្នាំខាងមុខនោះទេ” ។

រដ្ឋមន្ត្រីការបរទេសរូបនេះបញ្ជាក់ទៀតថា “ជារៀងរាល់ថ្ងៃ យើងកំពុងស្វែងរកវិធីដើម្បីអាចបញ្ចប់សង្រ្គាម ប៉ុន្តែខ្ញុំមិនឃើញមានភស្តុតាងណាមួយ ដែលរុស្ស៊ីចាប់អារម្មណ៍លើដំណោះស្រាយការទូត និងការចរចាឈានដល់ការបញ្ចប់សង្រ្គាមនេះនោះទេ” ។

លោក Blinken បានប្រាប់អ្នកយកព័ត៌មាន ក្នុងអំឡុងពេលដំណើរទស្សនកិច្ចទៅកាន់រដ្ឋធានី Niamey របស់ប្រទេសនីហ្សេរីយ៉ាថា “មធ្យោបាយលឿនបំផុតដើម្បីបញ្ចប់សង្គ្រាម នោះគឺបន្តគាំទ្រអ៊ុយក្រែន ដើម្បីឲ្យទីក្រុងកៀវកាន់តែខ្លាំងក្លានៅលើសមរភូមិប្រយុទ្ធ ដូច្នេះយើងសង្ឃឹមថា លោក ពូទីន នឹងទទួលស្គាល់ការពិត ហើយចុះចាញ់សង្គ្រាម ហើយនៅពេលនោះមកដល់ អាមេរិកនឹងក្លាយជាប្រទេសដំបូងគេ ដែលចូលរួមបញ្ចប់រឿងនេះ” ។

ពាក់ព័ន្ធនឹងបញ្ហានេះដែរ រដ្ឋមន្ត្រីការបរទេសរុស្ស៊ី លោក Sergey Lavrov បានឆ្លើយតបថា ទីក្រុងមូស្គូនៅតែត្រៀមខ្លួនជានិច្ចសម្រាប់ការចរចាលើវិបត្តិនៅអ៊ុយក្រែន ។ លោកបាននិយាយថា រុស្ស៊ីនឹងស្តាប់សំណើរបស់បស្ចិមប្រទេស ប្រសិនបើស្នើឲ្យមានពិភាក្សាអំពីវិធីបន្ធូរបន្ថយភាពតានតឹង ប៉ុន្តែការចរចាលើប្រធានបទអ៊ុយក្រែន គួរតែត្រូវបានធ្វើឡើង ជាមួយក្រុងវ៉ាស៊ីនតោនដោយផ្ទាល់តែម្ដង មិនមែនចរចាជាមួយអ៊ុយក្រែននោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ធនាគារមួយទៀតរបស់ អាមេរិក ក៏កំពុងដាំក្បាលចុះក្រោម