មន្ត្រីនៅធនាគារ First Republic ដែលមានមូលដ្ឋាននៅទីក្រុង San Francisco របស់សហរដ្ឋអាមេរិកបាននិយាយថា ភាគហ៊ុនធនាគារបស់ពួកគេកំពុងធ្លាក់ចុះ ហើយអាចនឹងក្ស័យធនបិទទ្វារផងដែរ ។

បច្ចុប្បន្នធនាគារ First Republic មានចំនួនអ្នកដាក់ប្រាក់បញ្ញើដែលមិនមានការធានារ៉ាប់រងច្រើន ដូចធនាគារអាមេរិកចំនួន ២ ផ្សេងទៀតដែលបានប្រកាសដួលរលំក្នុងរយៈពេលប៉ុន្មានថ្ងៃថ្មីៗនេះ ។ ប៉ុន្តែទោះ​ជា​យ៉ាង​ណា មេ​ដឹក​នាំ​ធនាគារ​ធំៗ​ចំនួន ១១ កំពុង​សន្យា​ធានាដោះស្រាយបញ្ហានេះផងដែរ ។

បន្ទាប់ពីអ្នកវិនិយោគមានការព្រួយបារម្ភថា អតិថិជនអាចដកប្រាក់របស់ពួកគេចេញពីធនាគារ First Republic, ភាគហ៊ុនរបស់អ្នកផ្តល់ប្រាក់កម្ចីក្នុងតំបន់បានធ្លាក់ចុះជាង ៦០ ភាគរយ ។

ពាក់ព័ន្ធនឹងបញ្ហានេះដែរ បានជំរុញឲ្យអ្នកដឹកនាំនៅស្ថាប័នហិរញ្ញវត្ថុចំនួន ១១ រួមទាំងក្រុមហ៊ុនហិរញ្ញវត្ថុ JP Morgan Chase និងធនាគារ Bank of America ព្រមព្រៀងគ្នាដាក់ប្រាក់ចំនួន ៣០ ពាន់លានដុល្លារ ដើម្បីជួយសង្គ្រោះវិបត្តិមួយនេះ ។

ស្របពេលជាមួយគ្នានេះ និយតករនៅធនាគារកណ្តាល រួមទាំងនាយកដ្ឋានរតនាគារ និងអ្នកពាក់ព័ន្ធផ្សេងទៀតបានស្វាគមន៍ចំពោះការបង្ហាញការគាំទ្រនេះ ហើយបានលើកឡើងថា វាបង្ហាញពី “ភាពធន់” នៃប្រព័ន្ធធនាគាររបស់អាមេរិកមិនឲ្យមានការដួលរលំបន្ថែមទៀត ។

គួរបញ្ជាក់ថា កាលពីពេលថ្មីៗនេះធនាគារចំនួន ២ របស់អាមេរិក ដូចជា ធនាគារ Silicon Valley និងធនាគារ Signature Bank បានប្រកាសក្ស័យធន បន្ទាប់ពីអតិថិជននាំគ្នាសម្រុកដកលុយចេញពីធនាគារ ដោយសារតែវិបត្តិសេដ្ឋកិច្ច ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកស្គាល់ធនាគារធំៗចំនួន ៥ របស់ អាមេរិក ដែលប្រកាសក្ស័យធន​