លោក វ្ល៉ាឌីមៀរ ពូទីន​ បានជំរុញឲ្យមហាសេដ្ឋីរុស្ស៊ី​ត្រូវតែវិនិយោគបន្ថែមទៀតលើបច្ចេកវិទ្យាថ្មី ផលិតផលគ្រឿងបរិក្ខារ និងសហគ្រាសផ្សេងៗ ដើម្បីយកឈ្នះប្រទេសលោកខាងលិចដែលប៉ុនប៉ងបំផ្លាញ​សេដ្ឋកិច្ចរុស្ស៊ី ។

លោក ពូទីន ថ្លែងក្នុងជំនួបជាលើកដំបូងជាមួយអ្នកធុរកិច្ច បន្ទាប់ពីវាយលុកអ៊ុយក្រែនថា យើងមិនមែនគ្រាន់តែរកលុយមួយមុខឡើយ វិនិយោគិនទាំងអស់ក៏មានតួនាទីសំខាន់មួយទៀតនោះគឺ គាំទ្រដល់សង្គម​ទាំងមូល ដូចនេះ​ មហាសេដ្ឋី​ទាំងអស់ត្រូវតែបង្កើនការវិនិយោគក្នុងប្រទេសជាចាំបាច់ ។

លោក ពូទីន លើកឡើងថា បច្ចុប្បន្នរុស្ស៊ីកំពុងប្រឈមមុខនឹងសង្គ្រាមដាក់ទណ្ឌកម្ម ហើយអ្នកមានៗជាច្រើនរបស់យើងក៏កំពុងរងទណ្ឌកម្មដូចគ្នា ប៉ុន្តែរុស្ស៊ីកំពុងតម្រង់ទិសដៅសេដ្ឋកិច្ចរបស់ខ្លួនទៅកាន់ប្រទេសដែលជាសម្ព័ន្ធមិត្តមិនដាក់ទណ្ឌកម្មលើរុស្ស៊ី ។

គួរបញ្ជាក់ផងដែរ ការអំពាវនាវរបស់លោក ពូទីន បានកើតឡើង បន្ទាប់ពីធនាគារអាមេរិកចំនួន ៣ ដូចជា ធនាគារ Silicon Valley Bank, ធនាគារ Silvergate និងធនាគារ Signature Bank បានដួលរលំក្នុងរយៈពេលត្រឹមមួយសប្តាហ៍ ៕

ប្រែសម្រួលដោយ ៖ នាង រតនៈ

ប្រភព ៖ Nation Thailand

ចុចអាន ៖ រុស្ស៊ី៖ ឧប្បត្តិហេតុយន្តហោះគ្មានមនុស្សបើក បញ្ជាក់ពីការចូលរួមរបស់អាមេរិក នៅក្នុងជម្លោះអ៊ុយក្រែន