ក្វាតេម៉ាឡា ប្តេជ្ញាគាំទ្រ តៃវ៉ាន់ ពេញទំហឹង

ប្រធានាធិបតីក្វាតេម៉ាឡា លោក Alejandro Giammattei បានប្តេជ្ញាគាំទ្រដោយគ្មានលក្ខខណ្ឌចំពោះ “តៃវ៉ាន់”។ លោកអះអាងបែបនេះនៅថ្ងៃអង្គារទី២៥ខែមេសា ក្នុងការធ្វើដំណើរដែលកើតឡើងចំពេលចិន បង្កើនសម្ពាធលើប្រទេសមួយចំនួនដែលនៅតែរក្សាទំនាក់ទំនងផ្លូវការជាមួយកោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្វាតេម៉ាឡា គឺជាប្រទេសមួយក្នុងចំណោមប្រទេសចំនួន១៣ ដែលមានទំនាក់ទំនងការទូតផ្លូវការជាមួយតៃវ៉ាន់។

ទោះបីជាយ៉ាងណាក៏ដោយ កាលពីខែមុន ប្រទេសហុងឌូរ៉ាស បានបោះបង់ចោលទីក្រុងតៃប៉ិ ងាកទៅរកទីក្រុងប៉េកាំងវិញ បន្ទាប់ពីស្នើសុំជំនួយក្នុងទំហំទឹកប្រាក់ជិត ២.៥ពាន់លានដុល្លារ។

ថ្លែងក្នុងពិធីស្វាគមន៍នៅខាងក្រៅការិយាល័យប្រធានាធិបតីតៃវ៉ាន់ លោក Giammattei និយាយថា ក្វាតេម៉ាឡានិងតៃវ៉ាន់ គឺជាបងប្អូនគ្នា និងជាសម្ព័ន្ធមិត្តដ៏សំខាន់។

លោកនិយាយថា “ខ្ញុំចង់ឲ្យមនុស្សគ្រប់គ្នាជឿជាក់ថា ក្វាតេម៉ាឡា នឹងបន្តជាសម្ព័ន្ធមិត្តការទូតដ៏រឹងមាំសម្រាប់តៃវ៉ាន់ ហើយនឹងបន្តធ្វើឲ្យស៊ីជម្រៅនូវកិច្ចសហប្រតិបត្តិការលើគ្រប់វិស័យ។

គួរបញ្ជាក់ថា ទំនាក់ទំនងរបស់ក្វាតេម៉ាឡាជាមួយចិន គឺមានអាយុកាល៩ទសវត្សរ៍ មុនពេលរដ្ឋាភិបាលបានភៀសខ្លួនទៅតៃវ៉ាន់ក្នុងឆ្នាំ១៩៤៩ បន្ទាប់ពីចាញ់សង្គ្រាមស៊ីវិលជាមួយក្រុមកុម្មុយនិស្តរបសលោក ម៉ៅ សេទុង ដែលបានបង្កើតសាធារណរដ្ឋប្រជាមានិតចិន។

រាល់ការលើកឡើងដែលថាតៃវ៉ាន់គឺជាប្រទេសឯករាជ្យ និងបំបែកខ្លួនពីប្រទេសចិន គឺធ្វើឲ្យទីក្រុងប៉េកាំងខឹងសម្បាយ៉ាងខ្លាំង ខណៈចិន​ មិនដែលបោះបង់គំនិតប្រើប្រាស់កម្លាំងដើម្បីនាំយកកោះនេះឲ្យមកស្ថិតនៅក្រោមការគ្រប់គ្រងរបស់ខ្លួននោះទេ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ចិន បញ្ជូននាវាចម្បាំងទៅក្បែរ តៃវ៉ាន់ ក្រោយលោកស្រី Tsai ជួបប្រធានសភាអាមេរិក