លោក Yevgeny Prigozhin មេដឹកនាំក្រុមទាហានស៊ីឈ្នួល Wagner Group បាននិយាយថា កងកម្លាំងរុស្ស៊ីគ្រប់គ្រងទីក្រុង Bakhmut របស់អ៊ុយក្រែន បានប្រហែល ៩៥ ភាគរយហើយ ខណៈនៅសល់ ៥ ភាគរយទៀត គឺមិនមានការលំបាកសម្រាប់ការវាយដណ្ដើមយកឡើយ ។

លោក Prigozhin បាននិយាយនៅក្នុងឆានែល Telegram របស់លោកថា “រហូតមកដល់ពេលនេះ ៩៥ ភាគរយនៃទឹកដីរបស់ទីក្រុង Bakhmut ត្រូវបានទ័ពរុស្ស៊ីវាយដណ្ដើមយក ហើយនៅសល់ទឹកដីប្រមាណជា ២ គីឡូម៉ែត្រការ៉េទៀតប៉ុណ្ណោះ យើងនឹងធ្វើការគ្រប់គ្រងទីក្រុងជីករ៉ែអំបិលភាគខាងកើតមួយនេះទាំងស្រុងតែម្ដង” ។

ចំណែកពាក់ព័ន្ធនឹងទឹកដីរបស់ទីក្រុង Bakhmut ដែលនៅសល់ប្រមាណ ៥ ភាគរយទៀតនោះ, មេដឹកនាំក្រុមទាហានស៊ីឈ្នួលរុស្ស៊ីរូបនេះលើកឡើងថា វានឹងមិនពិបាកសម្រាប់កងកម្លាំងរបស់យើងក្នុងប្រតិបត្តិការសឹកនេះនោះទេ ។

ទន្ទឹមនោះលោក Prigozhin បញ្ជាក់ទៀតថា “លោកមិនមានបំណងបន្សល់ទុកសញ្ញាសម្គាល់ណាមួយរបស់ក្រុមទាហានស៊ីឈ្នួលសម្រាប់ការវាយដណ្ដើមយកបានទីក្រុង Bakhmut នោះទេ ខណៈមហិច្ឆតាធំរបស់លោកគឺចង់បម្រើជាតិ និងរដ្ឋរបស់រុស្ស៊ីប៉ុណ្ណោះ” ។

គួរបញ្ជាក់ថា ការអះអាងរបស់លោក Prigozhin បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីមេទាហានស៊ីឈ្នួលរូបនេះបានប្រើលេស ក៏ដូចជាយុទ្ធសាស្ត្របំភាន់កងកម្លាំងអ៊ុយក្រែនអំពីការដកខ្លួនរបស់ទ័ពរុស្ស៊ី ចេញពីទឹកដីនៃទីក្រុង Bakhmut ដោយសារតែកង្វះគ្រាប់រំសេវសម្រាប់ប្រើប្រយុទ្ធក្នុងសមរភូមិភាគខាងកើតរបស់អ៊ុយក្រែនមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ លោក Medvedev ៖ ក្រោយការវាយប្រហារលើវិមានក្រឹមឡាំងហើយ រុស្ស៊ី គ្មានជម្រើសអ្វីក្រៅពីកម្ចាត់លោក Zelensky ទេ