ព័ត៌មានអន្ដរជាតិ

លោក ម៉េដវេដេវ បំពេញទស្សនកិច្ចនៅ ឡាវ ដោយស្ងាត់ៗ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ២៥ ឧសភា ២០២៣

ដោយ

អនុប្រធានក្រុមប្រឹក្សាសន្តិសុខរុស្ស៊ីលោក ឌីមីទ្រី ម៉េដវេដេវ បានធ្វើដំណើរបំពេញទស្សនកិច្ចទៅកាន់ប្រទេសឡាដោយស្ងាត់ៗដើម្បីជួបពិភាក្សាការងារជាមួយប្រមុខរដ្ឋឡាវលោក ថងលូន ស៊ីស៊ូលីត រួមជាមួយនឹងរដ្ឋមន្ត្រីការពរជាតិ និងរដ្ឋមន្ត្រីសន្តិសុខឡាវក្នុងទីក្រុងវៀងច័ន្ទ ខណៈក៏មានការការពារសុវត្ថិភាពកម្រិតខ្ពស់បំផុតផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃទី២៣ ខែឧសភា ប្រជាពលរដ្ឋនៅទីក្រុងវៀងច័ន្ទប្រទេសឡាវ មានការភ្ញាក់ផ្អើលយ៉ាងខ្លាំង នៅពេលដែលពួកគេឃើញរថពាសដែករបស់កងទ័ពឡាវជាច្រើនគ្រឿង ចល័តចេញដំណើរឈរជើងការពារសុវត្ថិភាពនៅតាមគោលដៅផ្សេងៗ ព្រមជាមួយនឹងកម្លាំងប៉ូលិសចរាចរណ៍ក្រុងវៀងច័ន្ទធ្វើចរាចរណ៍ឆ្វាត់ឆ្វែង ផ្សព្វផ្សាយការហាមចតយានយន្តគ្រប់ប្រភេទនៅតាមចិញ្ចើមផ្លូវសាមសែនថៃ និងផ្លូវផ្សេងៗទៀត ពីអាកាសយានដ្ឋានអន្តរជាតិវ៉ាតីរហូតដល់ “ហរខាំ” ឬវិមានប្រមុខរដ្ឋ ។

សកម្មភាព និងវិធានការទាំងនេះ ធ្វើឡើងស្របតាមវិធានការការពារសន្តិសុខកម្រិតខ្ពស់បំផុតដើម្បីទទួលភ្ញៀវសំខាន់ៗរបស់ប្រទេស ខណៈមិនយូរប៉ុន្មាន គេក៏ឃើញមានយន្តហោះរបស់រដ្ឋាភិបាលសហព័ន្ធរុស្ស៊ីមួយគ្រឿងបានចុះចតនៅអាកាសយានដ្ឋានអន្តរជាតិវ៉ាតី ហើយអ្នកធ្វើដំណើរចេញពីយន្តហោះខាងលើ គឺលោក ម៉េដវេដេវ ដែលបានដឹកនាំគណៈប្រតិភូបំពេញទស្សនកិច្ចនៅប្រទេសឡាវជាផ្លូវការ តបតាមការអញ្ជើញរបស់លោក ស៊ីសូលីត អគ្គលេខាធិការមជ្ឈិមបក្សបដិវត្តន៍ឡាវ និងជាប្រធានរដ្ឋឡាវ ។

ពាក់ព័ន្ធនឹងដំណើរបំពេញទស្សនកិច្ចរបស់លោក ម៉េដវេដេវ នេះដែរ រដ្ឋាភិបាលឡាវមិនបានផ្សព្វផ្សាយជាសាធារណៈជាមុននោះទេ ដើម្បីការពារសុវត្ថិភាពជូនអនុប្រធានក្រុមប្រឹក្សាសន្តិសុខរបស់រុស្ស៊ីរូបនេះ ។

គួរបញ្ជាក់ថា លោក ម៉េដវេដេវ ត្រូវបានគេចាត់ទុកជាមេដឹកនាំកំពូលម្នាក់របស់រុស្ស៊ី ខណៈលោកក៏ធ្លាប់ជានាយករដ្ឋមន្ត្រីទី១០ របស់រុស្ស៊ី និងធ្លាប់ធ្វើជាប្រធានាធិបតីរុស្ស៊ីផងដែរ ក្នុងចន្លោះឆ្នាំ ២០០៨ ដល់ឆ្នាំ ២០១២ ៕