រុស្ស៊ី ថា ព្រោះតែគោលនយោបាយអរិភាពរបស់ អាមេរិក ទើប កូរ៉េខាងជើង ផលិតបានមីស៊ីលផ្លោងស្ទើរតែទាំងស្រុង

ឯកអគ្គរដ្ឋទូត​រុស្ស៊ី​ប្រចាំ​កូរ៉េខាងជើង​លោក Aleksandr Matsegora បាននិយាយ​នៅក្នុង​បទសម្ភាសន៍​ជាមួយ​សារព័ត៌មាន Sputnik ថា កូរ៉េខាងជើង​អភិវឌ្ឍបាន​ស្ទើរតែ​ទាំងស្រុង​នូវ​កាំជ្រួចមីស៊ីល​ផ្លោង និងមីស៊ីលបាញ់នាំផ្លូវ ដោយសារតែគោលនយោបាយអរិភាពរបស់ទីក្រុងវ៉ាស៊ីនតោនមកលើទីក្រុងព្យុងយ៉ាង ។

ឯកអគ្គរដ្ឋទូតរូបនេះបាននិយាយថា “ប្រទេសដែលដែលតែងតែមើលស្រាលកូរ៉េខាងជើង គួរតែទទួលស្គាល់លើតំបន់ឧស្សាហកម្មយោធារបស់រដ្ឋាភិបាលទីក្រុងព្យុងយ៉ាង អំពីលទ្ធផលសម្រេចបានគួរឲ្យចាប់អារម្មណ៍នៃសំណុំមីស៊ីលផ្លោង និងមីស៊ីលបាញ់នាំផ្លូវក្នុងរយៈពេល ១០ ឆ្នាំចុងក្រោយនេះ” ។

លោក Matsegora បាននិយាយថា ការអភិវឌ្ឍន៍មីស៊ីលផ្លោងថ្មី និងការបាញ់សាកល្បងមីស៊ីលជាបន្តបន្ទាប់របស់ទីក្រុងព្យុងយ៉ាង គឺជាលទ្ធផលផ្ទាល់នៃគោលនយោបាយអរិភាពរបស់ទីក្រុងវ៉ាស៊ីនតោនចំពោះកូរ៉េខាងជើង ហើយថ្នាក់ដឹកនាំកូរ៉េខាងជើងក៏នឹងគ្មានហេតុផលអ្វីក្នុងការអភិវឌ្ឍន៍ និងអនុវត្តកម្មវិធីមីស៊ីលនុយក្លេអ៊ែរទ្រង់ទ្រាយធំបែបនេះនោះដែរ ប្រសិនបើមិនមានការរំលោភលើប្រទេសរបស់ខ្លួន ។

កាលពីពាក់កណ្តាលខែមេសា កូរ៉េខាងជើងបានបាញ់សាកល្បងកាំជ្រួចមីស៊ីលឆ្លងទ្វីបដំណើរការដោយឥន្ធនៈរឹងថ្មីឈ្មោះ Hwansong-18 ឆ្ពោះទៅសមុទ្រជប៉ុន និងបានហោះហើរដល់ចម្ងាយប្រហែល ១,០០០ គីឡូម៉ែត្រ ហើយក៏បានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន ។

ទន្ទឹមនោះ វាគឺជាការបាញ់បង្ហោះមីស៊ីលផ្លោងលើកទី ៩ ក្នុងឆ្នាំ ២០២៣ និងជាការបាញ់បង្ហោះលើកទី ១២ រួមជាមួយនឹងកាំជ្រួចមីស៊ីលនាំផ្លូវ ខណៈនៅឆ្នាំ ២០២២ កូរ៉េខាងជើងបានបាញ់សាកល្បងមីស៊ីលផ្លោងរហូតដល់ទៅ ៣៧ គ្រាប់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី បញ្ជាក់ឡើងវិញពីទំនាក់ទំនងជាមួយ ចិន និងអតីតសហភាពសូវៀត