អឺរ៉ុប ប្រាប់លក្ខខណ្ឌដែល រុស្ស៊ី បើកការចរចារកសន្តិភាពនៅ អ៊ុយក្រែន

លោក Josep Borrell តំណាងជាន់ខ្ពស់ទទួលបន្ទុកគោលនយោបាយកិច្ចការបរទេស និងសន្តិសុខនៃសហភាពអឺរ៉ុប (EU) បាននិយាយថា រុស្ស៊ីនឹងធ្វើការចរចារកសន្តិភាព លុះត្រាតែក្នុងលក្ខខណ្ឌពួកគេឈ្នះសង្គ្រាមនៅអ៊ុយក្រែន ។

លោក Borrell បាននិយាយនៅក្នុងវេទិកាអ្នកជំនាញនៅទីក្រុងបាសេឡូណា របស់ប្រទេសអេស្ប៉ាញថា “លោកមិនមានសុទិដ្ឋិនិយមចំពោះស្ថានភាពនៅអ៊ុយក្រែននោះទេ ប៉ុន្តែលោកជឿជាក់ថា រុស្ស៊ីនឹងមិនចរចារកសន្តិភាពឡើយ ប្រសិនបើរដ្ឋាភិបាលទីក្រុងមូស្គូមិនទាន់រកបានជ័យជម្នះក្នុងជម្លោះនៅអ៊ុយក្រែន” ។

អ្នកការទូតរបស់អឺរ៉ុបរូបនេះបានលើកឡើងទៀតថា “ខ្ញុំឃើញឆន្ទៈច្បាស់លាស់របស់រុស្ស៊ីក្នុងការឈ្នះសង្គ្រាម ដូច្នេះឥឡូវនេះមិនមែនជាពេលដែលរុស្ស៊ីត្រូវចរចារកសន្តិភាពនោះទេ ពោលរហូតទាល់តែពួកគេឈ្នះសង្គ្រាមនៅអ៊ុយក្រែនសិន” ។

លោក Borrell បាននិយាយថា “ខ្ញុំមិនមានសុទិដ្ឋិនិយម ក៏ដូចជាការរំពឹងទុកណាមួយអំពីរបៀបដោះស្រាយជម្លោះនេះនោះទេ ប៉ុន្តែទោះជាយ៉ាងណា សហភាពអឺរ៉ុបនៅតែបន្តការផ្ដល់ជំនួយយោធារបស់ខ្លួនសម្រាប់អ៊ុយក្រែន” ។

គួរបញ្ជាក់ថា ការអត្ថាធិប្បាយរបស់លោក Borrell បានកើតឡើងនៅថ្ងៃតែមួយ ដែលយោធារុស្ស៊ីបានបើកការវាយប្រហារលើមូលដ្ឋានទ័ពអាកាសអ៊ុយក្រែន ជាពិសេសគឺមុនពេលដែលអ៊ុយក្រែនរៀបចំគម្រោងបើកការវាយលុកទ្រង់ទ្រាយធំមកលើរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ទីបំផុត រុស្ស៊ី ដកខ្លួនចេញពីសន្ធិសញ្ញាគ្រប់គ្រងអាវុធរបស់ អឺរ៉ុប ជាមួយ ណាតូ