ទីក្រុងរុស្ស៊ី មួយទៀត រងការវាយប្រហារដោយយន្តហោះដ្រូន អ៊ុយក្រែន

អភិបាល​ក្រុង Kursk លោក Roman Starovoyt បាន​និយាយ​នៅ​ព្រឹក​ព្រលឹម​ថ្ងៃ​សុក្រទី២ខែមិថុនា​ថា យន្តហោះ​ដ្រូន​អ៊ុយក្រែន​ជាច្រើន​គ្រឿង ​ត្រូវ​បាន​បាញ់​ទម្លាក់​នៅ​ជិត​ទីក្រុង របស់​រុស្ស៊ីមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ លោក Starovoyt បានជំរុញឲ្យអ្នកក្រុង រក្សាភាពស្ងប់ស្ងាត់។ លោកបន្ថែមថា “ទីក្រុងដែលមានព្រំដែនជាប់ប្រទេសអ៊ុយក្រែនមួយនេះ ស្ថិតនៅក្រោមការការពារយ៉ាងម៉ឺងម៉ាត់ពីសំណាក់យោធារបស់យើង”។

ការ​ថ្លែង​របស់​អភិបាល​ក្រុង កើត​ឡើង​ភ្លាមៗ​បន្ទាប់​ពី​បណ្តាញ Telegram ជាច្រើន បាន​រាយការណ៍​ថា ស្នូរ​ផ្ទុះត្រូវ​បាន​ឮពាស​ពេញ​ទីក្រុង។ ឆានែលមួយ ក៏បានបង្ហោះវីដេអូ ដែលបង្ហាញពីប្រព័ន្ធការពារដែនអាកាស បាញ់មីស៊ីលទៅលើមេឃផងដែរ។

គួរបញ្ជាក់ថា តំបន់ព្រំដែនរុស្សី តែងតែរងការបាញ់កាំភ្លើងធំ និងគ្រាប់រ៉ុកកែត ក៏ដូចជាការវាយប្រហារដោយយន្តហោះគ្មានមនុស្សបើកផងដែរ ចាប់តាំងពីទីក្រុងមូស្គូ បើកប្រតិបត្តិការយោធានៅអ៊ុយក្រែនក្នុងខែកុម្ភៈឆ្នាំ២០២២។

ក្រោយមក ការ​វាយ​ឆ្មក់​ ក៏ចាប់​ផ្តើមរាលដាល​ចូល​ក្នុង​ទឹក​ដី​រុស្ស៊ី​ ដោយកាលពីថ្ងៃអង្គារទី៣០ខែឧសភា យន្តហោះគ្មានមនុស្សបើកដែលផ្ទុកគ្រឿងផ្ទុះ បានវាយប្រហារអគារលំនៅដ្ឋានខ្ពស់ៗនៅក្នុងទីក្រុងមូស្គូ។

គ្មាន​នរណា​ម្នាក់​ស្លាប់ឡើយ ប៉ុន្តែមាន​ជន​ស៊ីវិល​ពីរ​នាក់​រង​របួស​ស្រាល។ យោងតាមមន្ត្រីរុស្ស៊ី, ទីក្រុងកៀវ បានធ្វើការវាយប្រហារនេះ ដើម្បីបង្កភាពភ័យខ្លាច និងបំភិតបំភ័យប្រជាជន។

ចំណែកកាលពីថ្ងៃព្រហស្បតិ៍ ក្រសួងការពារជាតិរុស្ស៊ីនិយាយថា កងទ័ពរបស់ខ្លួន ក៏បានវាយបកការលុកលុយពីសំណាក់អ៊ុយក្រែន នៅក្នុងតំបន់ Belgorod ផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី៖ អ៊ុយក្រែន ប្រើដ្រូន៨គ្រឿង ដើម្បីវាយប្រហារទីក្រុង មូស្គូ