លោក Macron ៖ “ធ្វើយ៉ាងណាក៏ដោយឲ្យតែស្ដារសណ្ដាប់ធ្នាប់ បារាំង បានឡើងវិញ”

ប្រធានាធិបតីបារាំងលោក Emmanuel Macron ក្នុងអំឡុងពេលកិច្ចប្រជុំជាមួយរដ្ឋមន្ត្រីមួយចំនួនកាលពីយប់ថ្ងៃអាទិត្យ បានអំពាវនាវឲ្យពួកគេធ្វើអ្វីគ្រប់យ៉ាងតាមដែលអាចធ្វើទៅបានដើម្បីស្តារសណ្តាប់ធ្នាប់នៅក្នុងប្រទេសបារាំង ចំពេលមានចលាចលដែលកំពុងបន្តកើតមានឡើង ។

ក្នុងកិច្ចប្រជុំដែលរៀបចំឡើងនៅវិមាន Elysee លោក Macron បានស្នើឲ្យលោកនាយករដ្ឋមន្ត្រី Elisabeth Borne រដ្ឋមន្ត្រីក្រសួងមហាផ្ទៃ និងរដ្ឋមន្ត្រីយុត្តិធម៌ ធ្វើយ៉ាងណាធ្វើទៅឲ្យតែស្តារសណ្តាប់ធ្នាប់នៅក្នុងប្រទេសបារាំងបានឡើងវិញ ។

ទន្ទឹមនោះ លោក Macron ក៏បាននិយាយផងដែរថា រដ្ឋាភិបាលបារាំងត្រូវតែបន្តគាំទ្រមន្ត្រីអនុវត្តច្បាប់ និងសមាជិកនៃទីភ្នាក់ងារពិសេសដែលត្រូវបានប្រមូលផ្តុំក្នុងរយៈពេល ៥ ថ្ងៃកន្លងមកនេះ ហើយលោកក៏គ្រោងនឹងជួបអភិបាលក្រុងដែលរងផលប៉ះពាល់ដោយកុបកម្មជាង ២២០ នាក់នៅវិមាន Elysee នាថ្ងៃអង្គារនេះផងដែរ ។

ចំណែករដ្ឋមន្ត្រីក្រសួងមហាផ្ទៃបារាំងលោក Gerald Darmanin បាននិយាយកាលពីថ្ងៃសុក្រថា មន្ត្រីអនុវត្តច្បាប់ជាង ៤៥,០០០ នាក់រួមទាំងអង្គភាពពិសេសបានចូលរួមក្នុងការប្រយុទ្ធប្រឆាំងនឹងកុបកម្មនៅបារាំង ខណៈដែលមន្ត្រីប៉ូលិស និងកងកម្លាំងប្រដាប់អាវុធជាង ៣០០ នាក់បានរងរបួសនៅក្នុងរយៈពេល ៣ ថ្ងៃដំបូងនៃភាពចលាចលនៅក្នុងប្រទេស ។

ពាក់ព័ន្ធនឹងបញ្ហានេះដែរ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបានជំរុញឲ្យរដ្ឋាភិបាលបារាំង ធ្វើការដោះស្រាយបញ្ហាឲ្យស៊ីជម្រៅនៃការរើសអើងជាតិសាសន៍ និងការរើសអើងក្នុងការអនុវត្តច្បាប់ បន្ទាប់ពីយុវជនម្នាក់ឈ្មោះ Nahel Merzouk អាយុ ១៧ ឆ្នាំត្រូវប៉ូលិសបាញ់សម្លាប់ក្នុងប្រទេសបារាំង ។

Nahel ត្រូវបានប៉ូលិសបាញ់សម្លាប់នៅតំបន់ Nanterre ជាយក្រុងប៉ារីសកាលពីសប្ដាហ៍មុន បន្ទាប់ពីរូបគេមិនគោរពច្បាប់ចរាចរណ៍ ខណៈមន្ត្រី​ប៉ូលិសដែលប្រព្រឹត្តទង្វើនេះ ត្រូវ​បាន​ចោទ​ប្រកាន់​ពី​បទ​មនុស្ស​ឃាត​ និង​កំពុងត្រូវបាន​ឃុំ​ខ្លួនផងដែរ ។

ចាប់តាំងពីពេលនោះមក កុបកម្មបានផ្ទុះមានឡើងនៅទូទាំងប្រទេស ខណៈក្រុមបាតុករបានប្រើអំពើហិង្សា ក៏ដូចជាប៉ះទង្គិចជាមួយប៉ូលិស ហើយបានដុតបំផ្លាញអគារសាធារណៈ និងរថយន្តផងដែរ ខណៈរហូតមកដល់ពេលនេះបាតុកររាប់រយនាក់ត្រូវបានចាប់ឃុំខ្លួន និងដាក់ពន្ធនាគារ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ កុបករនៅបារាំង ចូលប៉ុនប៉ងធ្វើឃាតគ្រួសារចៅហ្វាយក្រុង ដល់ក្នុងផ្ទះ