អ៊ុយក្រែន មិនហ៊ានទិញអាវុធចិន ព្រោះខ្លាចអាមេរិក ខឹង

អនុរដ្ឋមន្ត្រីការពារជាតិអ៊ុយក្រែន លោក Vitaly Deinega បានលើកឡើង ក្នុងអំឡុងកិច្ចពិភាក្សាអំពីសារសំខាន់នៃយន្តហោះគ្មានមនុស្សបើកសង្គ្រាមទំនើបថា ទីក្រុងកៀវ មិនហ៊ានទិញអាវុធរបស់ចិនឡើយ ដើម្បីកុំឲ្យអាមេរិកខឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Deinega បានប្រាប់សារព័ត៌មានអ៊ុយក្រែន Leviy Bereg កាលពីថ្ងៃចន្ទ ទី៣ ខែកក្កដាថា “យើងមិនអាចទិញអាវុធរបស់ចិនបានទេ ដើម្បីកុំឲ្យប៉ះពាល់ដល់ទំនាក់ទំនងរបស់យើងជាមួយសហរដ្ឋអាមេរិក”។

ខណៈមន្ត្រី​រូប​នេះ​កំពុង​ពិភាក្សា​អំពីទាហាន​អ៊ុយក្រែន​ប្រើប្រាស់​យន្តហោះ​ចម្បាំង DJI Mavic ​ផលិត​នៅ​ចិន​ លោកពន្យល់ថា កងកម្លាំងទីក្រុងកៀវក៏មានយន្តហោះយ៉ាងច្រើនផងដែរ ដូច្នេះយើងមិនអាចទិញអ្វីស្រេចតែចិត្តបានទេ ព្រោះក្រសួងការពារជាតិ មានគោលជំហរក្នុងការទិញសព្វាវុធ។

ស្របពេលជាមួយគ្នានោះ លោក​បាន​ទទួល​ស្គាល់​ថា បច្ចុប្បន្ន រុស្ស៊ី​​មាន​ប្រៀបជាងអ៊ុយក្រែន បើនិយាយទាក់ទងនឹង​យន្តហោះ​គ្មាន​មនុស្ស​បើក ប៉ុន្តែ​​ទោះជាយ៉ាងណា ស្ថានការណ៍​ក៏នឹងមានការ​ប្រែប្រួលផងដែរ ​។

លោកទទូចថា “យន្តហោះគ្មានមនុស្សបើក នឹងក្លាយជាកត្តាសំខាន់ក្នុងការប្រយុទ្ធនាពេលអនាគត ហើយអ៊ុយក្រែននឹងបម្រើជាប្រភពនៃការច្នៃប្រឌិតសម្រាប់លោកខាងលិច។ នាពេលអនាគត យើងនិងរុស្ស៊ី នឹងមានភាពខុសគ្នា ជាពិសេសគ្រឿងសឹកដែលលោកខាងលិចផ្តល់ជូនដល់ទីក្រុងកៀវ គឺនឹងល្អជាងអ្វីដែលទីក្រុងមូស្គូមានទៅទៀត”។

ទោះបីជាយ៉ាងណាក៏ដោយ ប្រធានាធិបតីអ៊ុយក្រែនលោក Volodymyr Zelensky បានលើកឡើងកាលពីថ្ងៃអាទិត្យហើយថា ប្រតិបត្តិការវាយបកដណ្ដើមយកទឹកដីរបស់រុស្ស៊ីខ្លះមកវិញពីសំណាក់កងម្លាំងទីក្រុងកៀវ ត្រូវទទួលរងបរាជ័យ ដោយសារតែប្រទេសលោកខាងលិច។

ថ្លែងទៅកាន់ប្រព័ន្ធផ្សព្វផ្សាយអេស្ប៉ាញ លោក Zelensky អះអាងថា “ប្រតិបត្តិការវាយបករបស់អ៊ុយក្រែនដែលបានធ្វើឡើងកាលពីដើមខែមិថុនា គឺត្រូវបានបំផ្លាញគ្មានសល់ ព្រោះតែកាំភ្លើងធំដែលផ្គត់ផ្គង់ដោយលោកខាងលិច មកដល់ទឹកដីអ៊ុយក្រែនយឺតពេលពេក”៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Zelensky ថា ព្រោះតែលោកខាងលិច ទើប អ៊ុយក្រែន បរាជ័យវាយ បកលើ រុស្ស៊ី