អាមេរិក ទិញជីពី រុស្ស៊ី ក្នុងតម្លៃ ៩៤៤ លានដុល្លារ

យោងតាមទិន្នន័យពីទីភ្នាក់ងារស្ថិតិអាមេរិកបានឲ្យដឹងថា សហរដ្ឋអាមេរិកឈានដល់កំណត់ត្រាថ្មីមួយដោយបានទិញជីពីរុស្ស៊ីក្នុងចំនួន ៩៤៤ លានដុល្លារនៅចន្លោះខែមករាដល់ខែកក្កដា ។

ទោះយ៉ាងណា ការបញ្ជាទិញក្នុងខែកក្កដាបានធ្លាក់ចុះ ៣ ដង បើប្រៀបធៀបនឹងខែមិថុនា ហើយជិត ៤០ ភាគរយ បើប្រៀបធៀបនឹងឆ្នាំមុន មកត្រឹម ៥៤.៤ លានដុល្លារ ដែលជាកម្រិតទាបបំផុត ចាប់តាំងពីខែសីហា ឆ្នាំ២០២១ ។

ប្រទេសរុស្ស៊ីគឺជាអ្នកផ្គត់ផ្គង់ជីធំទី ២ របស់សហរដ្ឋអាមេរិកនៅឆ្នាំនេះ ខណៈអ្នកផ្គត់ផ្គង់ធំបំផុតគឺ ប្រទេសកាណាដា ដែលបាននាំចេញជីចំនួន ២.៨ ពាន់លានដុល្លារក្នុងរយៈពេល ៧ ខែ ។ ទន្ទឹមនឹងនេះ អារ៉ាប៊ីសាអូឌីត អ៊ីស្រាអែល និងកាតា គឺជាប្រទេសកំពូលទាំង ៥ ផ្សេងទៀតដែលសហរដ្ឋអាមេរិកនាំចូលជី ។

គួរបញ្ជាក់ថា ចាប់ពីខែមករាដល់ខែកក្កដា សហរដ្ឋអាមេរិកបានកាត់បន្ថយការនាំចូលជីរបស់ខ្លួនចំនួន​ ២២ ភាគរយ និងមានតម្លៃសរុបចំនួន ៦ ពាន់លានដុល្លារ ៕

ប្រែសម្រួល៖ នាង រតនៈ

ប្រភព៖ Sputnik