វៀតណាម ចាយលុយសម្រាប់អូសខ្សែភ្លើងជាង ៤៥ លានដុល្លារដើម្បីនាំអគ្គិសនីពី ឡាវ

វៀតណាមកាលពីពេលថ្មីៗនេះបានបើកការដ្ឋានសាងសង់ខ្សែបណ្តាញអគ្គិសនីដើម្បីនាំចូលអគ្គិសនីពីប្រទេសឡាវ ក្នុងគោលបំណងដើម្បីទប់ទល់នឹងការខ្វះខាតថាមពលនៅក្នុងប្រទេស ស្របពេលដែលកំពុងជួបប្រទះបញ្ហាប្រឈមសម្រាប់ការផ្គត់ផ្គង់ ។

ទន្ទឹមនោះ អគ្គិសនីជាតិវៀតណាម (EVN) នឹង​ចំណាយ​ថវិកា​ចំនួន ៤៥.៣៦ លាន​ដុល្លារ​អាមេរិក​លើ​ការអូសខ្សែ​ភ្លើង​ប្រវែង ៤៥ គីឡូម៉ែត្រ​ដែល​នឹង​តភ្ជាប់​ពីរោងចក្រ​ថាមពល​ដើរដោយខ្យល់​មូសុង​ទៅ​ស្ថានីយចែកចាយចរន្តអគ្គិសនី Thanh My ក្នុង​ខេត្ត Quang Nam ភាគ​កណ្តាល​ប្រទេស​វៀតណាម ។

សម្រាប់គម្រោងនេះដែរ អគ្គិសនីវៀតណាមបានខ្ចីលុយ​ពី​ធនាគារអភិវឌ្ឍន៍កសិកម្ម និងជនបទរបស់ខ្លួនដែលគ្រោងនឹងបញ្ចប់នៅចុងឆ្នាំ ២០២៤ ខណៈខ្សែភ្លើងនេះក៏នឹងបន្ថែមថាមពលអគ្គិសនីចំនួន ២,៥០០ មេហ្គាវ៉ាត់ទៅបណ្តាញអគ្គិសនីរបស់វៀតណាមផងដែរ ។

ក្រៅពីឡាវ វៀតណាម​ក៏សម្លឹង​រកមើលការទិញអគ្គិសនីបន្ថែមពីចិនផងដែរ ដោយសារតែអគ្គិសនីនៅក្នុងប្រទេស ​មានសមត្ថភាពផលិតបានប្រហែល ៤២,០០០ មេហ្គាវ៉ាត់ និង ១៩,០០០​ មេហ្គាវ៉ាត់នៅពេលរសៀល និង ៣៩,២០០ មេហ្គាវ៉ាត់ និង ១៨,០០០ មេហ្គាវ៉ាត់ពេលល្ងាច ។

គួរបញ្ជាក់ថា រោងចក្រថាមពលដើរដោយខ្យល់មូសុងឡាវ គឺជាគម្រោងថាមពលចរន្តខ្យល់ដ៏ធំបំផុតនៅអាស៊ីអាគ្នេយ៍ ដែលមានកម្លាំងរហូតដល់ ៦០០ មេហ្គាវ៉ាត់ ដែលមានទួរប៊ីនខ្យល់ចំនួន ១៣៣ និងលាតសន្ធឹងលើផ្ទៃដីសម្បទានជាង ១ ពាន់ហិកតា ខណៈការសាងសង់គម្រោងដ៏មហិច្ឆតានេះ បានចាប់ផ្តើមនៅដើមខែមេសា ឆ្នាំនេះ ហើយរំពឹងនឹងបញ្ចប់រួចរាល់នៅឆ្នាំ ២០២៥ ៕

ប្រែសម្រួល៖ នាង រតនៈ

ប្រភព៖​ Laotian Times

ចុចអាន៖ លោក សេដ្ឋា ស្នើឲ្យកងកម្លាំងថៃ ផ្អាកទិញអាវុធសិន ដើម្បីយកលុយទៅជួយប្រជាជនវិញ