អ៊ុយក្រែន រ៉ាយរ៉ាប់ស្ថានភាពក្នុងតំបន់ប្រយុទ្ធជាមួយ រុស្ស៊ី ទៅកាន់ អាមេរិក

ឧត្តមសេនីយកំពូលរបស់អ៊ុយក្រែនលោក Valeriy Zaluzhny កាលពីថ្ងៃអង្គារបានរៀបរាប់យ៉ាងលម្អិតអំពីស្ថានភាពនៅក្នុងតំបន់ប្រយុទ្ធជាមួយរុស្ស៊ី ទៅកាន់ប្រធានអគ្គសេនាធិការចម្រុះសហរដ្ឋអាមេរិកលោក Charles Brown នៅក្នុងកិច្ចសន្ទនាតាមទូរសព្ទដ៏កម្រមួយ ។

នៅក្នុងកិច្ចសន្ទនានោះ លោក Zaluzhny បានពណ៌នាថា “ស្ថានភាពនៅក្នុងតំបន់ប្រយុទ្ធជាមួយកងកម្លាំងរុស្ស៊ី គឺស្មុគស្មាញ និងសាំញ៉ាំ ជាពិសេសកម្លាំងទ័ពរបស់អ៊ុយក្រែនកំពុងជាប់គាំងនៅផ្នែកជាច្រើន ដោយសារតែបញ្ហាកង្វះគ្រាប់បាញ់ និងកម្លាំងទ័ពប្រយុទ្ធ ប៉ុន្តែយើងនៅតែអាចគ្រប់គ្រងស្ថានការណ៍នោះបាន” ។

ស្របពេលជាមួយគ្នានោះ លោកឧត្តមសេនីយកំពូលរូបនេះលើកឡើងទៀតថា បច្ចុប្បន្នតំបន់អ៊ុយក្រែនដែលកំពុងក្លាយជាផ្ទាំងស៊ីបនៃការវាយប្រហារពីសំណាក់កងកម្លាំងរុស្ស៊ី រួមមានទីក្រុង Avdeevka, ទីក្រុង Kupyansk និងទីក្រុង Maryinka ។

លោក Zaluzhny បានសរសេរនៅក្នុងឆានែល Telegram ថា “យើងក៏បានពិភាក្សាអំពីផែនការសម្រាប់ទប់ទល់នឹងការវាយលុករបស់រុស្ស៊ីនៅក្នុងរដូវរងារដែលខិតជិតមកដល់ផងដែរ ជាពិសេសគឺការផ្គត់ផ្គង់ប្រព័ន្ធខែលការពារដែនអាកាស ក៏ដូចជាយន្តហោះគ្មានមនុស្សបើកជាដើម” ។

មន្ត្រីអាមេរិកប៉ាន់ប្រមាណថា ចាប់តាំងពីផ្ទុះសង្គ្រាមជាមួយរុស្ស៊ីដែលអូសបន្លាយពេលជិត ២ ឆ្នាំហើយនោះ អ៊ុយក្រែនបានបាត់កម្លាំងទ័ពចំនួន ៧០,០០០ នាក់ និងរហូតដល់ ១២០,០០០ រងរបួស ខណៈក៏ខូចខាតសព្វាវុធដែលលោកខាងលិចផ្ដល់ឲ្យ យ៉ាងច្រើនសន្ធឹកសន្ធាប់ផងដែរ ។

ប្រតិបត្តិការវាយបករបស់អ៊ុយក្រែនបានចាប់ផ្តើមកាលពីថ្ងៃទី៤ ខែមិថុនា បន្ទាប់ពីរដ្ឋាភិបាលទីក្រុងកៀវបានបញ្ចេញកម្លាំងទ័ពក្នុងកងពលតូចប្រយុទ្ធដែលហ្វឹកហ្វឺនដោយគ្រូបង្ហាត់របស់អង្គការណាតូ និងបំពាក់ដោយអាវុធរបស់លោកខាងលិច រួមទាំងរថក្រោះខ្លារខិន Leopard និង Challenger ។

ទោះយ៉ាងណា ៣ ខែក្រោយមក ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា ប្រតិបត្តិការវាយលុករបស់កងកម្លាំងទីក្រុងកៀវ គឺរងបរាជ័យយ៉ាងអាម៉ាស់ និងខូចខាតឧបករណ៍យោធាយ៉ាងដំណុំ ខណៈមន្ត្រីលោកខាងលិចមួយចំនួនក៏ទទួលស្គាល់ពីការខកចិត្តមួយនេះផងដែរ ។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែនដែលផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ នៅតែបន្តអូសបន្លាយពេល និងមិនមានសញ្ញាថមថយណាមួយឡើយ ខណៈសហរដ្ឋអាមេរិក និងសម្ព័ន្ធមិត្តក៏បានផ្ដល់កញ្ចប់ជំនួយយោធាទៅឲ្យរដ្ឋាភិបាលទីក្រុងកៀវក្នុងតម្លៃរាប់រយពាន់លានដុល្លារផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ហេតុអ្វីបានជា អ៊ុយក្រែន ប្រើតែយន្តហោះគ្មានមនុស្សបើកក្នុងប្រតិបត្តិការ​វាយបកលើ រុស្ស៊ី?