កូរ៉េខាងជើង ជូនដំណឹងពីការបាញ់បង្ហោះផ្កាយរណបចារកម្ម នៅប៉ុន្មានថ្ងៃខាងមុខ

តាមសេចក្តីរាយការណ៍របស់ប្រព័ន្ធផ្សព្វផ្សាយជប៉ុន, ប្រទេសកូរ៉េខាងជើង អាចប៉ុនប៉ងបាញ់បង្ហោះផ្កាយរណបចារកម្មទីបី នៅប៉ុន្មានថ្ងៃខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីក្រុងតូក្យូ, ទីក្រុងព្យុងយ៉ាងបានជូនដំណឹងដល់ខ្លួនថា ពួកគេអាចបាញ់បង្ហោះផ្កាយរណប ក្នុងអំឡុងពេលប៉ុន្មានថ្ងៃខាងមុខ ពោលគឺមិនលើសពីថ្ងៃទី៣០ខែវិច្ឆិកានោះទេ។

ស្របពេលជាមួយគ្នានោះ ប្រទេសជប៉ុន នឹងធ្វើការជាមួយកូរ៉េខាងត្បូង ដើម្បីជំរុញឲ្យកូរ៉េខាងជើង កុំអនុវត្តការបាញ់បង្ហោះឲ្យសោះ ព្រោះវានឹងបំពានលើសេចក្តីសម្រេចរបស់អង្គការសហប្រជាជាតិ។

ឆ្មាំសមុទ្រជប៉ុន និយាយថា ការជូនដំណឹងរបស់ទីក្រុងព្យុងយ៉ាង បានកំណត់តំបន់ដែនសមុទ្រចំនួនបី ដែលជាកន្លែងបំណែកពីគ្រាប់រ៉ុកកែតនាំផ្កាយរណប នឹងធ្លាក់។ ក្នុងនោះ តំបន់ចំនួនពីរ គឺស្ថិតនៅភាគខាងលិចឧបទ្វីបកូរ៉េ និងមួយទៀតនៅភាគខាងកើតកោះ Luzon របស់ប្រទេសហ្វីលីពីន។

សូមបញ្ជាក់ ឆ្នាំនេះ ទីក្រុង​ព្យុងយ៉ាង ​បាន​បរាជ័យ​ពីរដងរួចមកហើយ ​ក្នុង​ការបាញ់បង្ហោះ​ផ្កាយរណប​ចារកម្ម​ទៅ​ក្នុង​លំហ។

លោក Kang Ho-pil ប្រធានផ្នែកប្រតិបត្តិការនៅអគ្គសេនាធិការចម្រុះកូរ៉េខាងត្បូង បានព្រមា​នថា ទីក្រុងសេអ៊ូលនឹងចាត់វិធានការចាំបាច់ ប្រសិនបើការបាញ់បង្ហោះ ពិតជាកើតឡើងមែន។

ក្រុមប្រឹក្សាសន្តិសុខអង្គការសហប្រជាជាតិ បានហាមប្រាមទីក្រុងព្យុងយ៉ាងម្តងជាពីរដង មិនឲ្យបាញ់បង្ហោះផ្កាយរណប ព្រោះមើលឃើញថា វាគ្រាន់ជាលេសដើម្បីសាកល្បងបច្ចេកវិទ្យាមីស៊ីលរបស់កូរ៉េខាងជើងប៉ុណ្ណោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្អូនស្រីលោក គីម ជុងអ៊ុន ប្តេជ្ញាបាញ់បង្ហោះផ្កាយរណបចារកម្ម បន្ថែមទៀត