ព័ត៌មានអន្ដរជាតិ

ផ្កាយរណបចារកម្មដែល កូរ៉េខាងជើង បាញ់បង្ហោះប៉ុន្មានថ្ងៃមុន គឺដើម្បីថតកន្លែងសំខាន់ៗបស់ អាមេរិក

បានផុស

១០ ខែ មុន

នៅ

ថ្ងៃអង្គារ ២៨ វិច្ឆិកា ២០២៣

ដោយ

ទីភ្នាក់ងារសារព័ត៌មាន Reuters បានរាយការណ៍នៅអង្គារនេះថា ផ្កាយរណបចារកម្មរបស់កូរ៉េខាងជើងបានថតរូបសេតវិមាន និងមន្ទីរបញ្ចកោណរបស់សហរដ្ឋអាមេរិក ស្របពេលដែលលោក គីម ជុងអ៊ុន ក៏ទទួលបានរូបភាពទាំងនោះផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Reuters បានបញ្ជាក់ទៀតថា ក្រៅពីសេតវិមាន និងមន្ទីរបញ្ចកោណ, ផ្កាយរណបចារកម្មរបស់កូរ៉េខាងជើងមួយនេះថែមទាំងបានថតរូបនាវាផ្ទុកយន្តហោះនៅឯមូលដ្ឋានទ័ពជើងទឹកអាមេរិកក្នុងទីក្រុង Norfolk រដ្ឋ Virginia ផងដែរ ។

កាលពីថ្ងៃទី ២១ ខែវិច្ឆិកា ប្រទេសកូរ៉េខាងជើងបានបាញ់បង្ហោះផ្កាយរណបចារកម្មយោធាមួយដែលមានឈ្មោះថា Malligyong-1 ចូលទៅក្នុងលំហយ៉ាងត្រឹមត្រូវ និងជោគជ័យ ប៉ុន្តែមួយថ្ងៃក្រោយមកកូរ៉េខាងត្បូងបានប្រកាសឆ្លើយតប ដោយផ្អាកផ្នែកខ្លះនៃកិច្ចព្រមព្រៀងយោធាជាមួយកូរ៉េខាងជើង ដើម្បីកាត់បន្ថយភាពតានតឹង ។

ទោះយ៉ាងណា ២ ថ្ងៃក្រោយមក ពោលនៅថ្ងៃទី២៣ ខែវិច្ឆិកា ក្រសួងការពារជាតិកូរ៉េខាងជើងបានប្រកាសវិញថា រដ្ឋាភិបាលទីក្រុងព្យុងយ៉ាង នឹងលែងគោរពតាមកិច្ចព្រមព្រៀងទាំងមូលហើយ ហើយថែមទាំងនឹងបន្តសកម្មភាព ក៏ដូចជាដកវិធានការដែលធ្វើឡើងដើម្បីការពារជម្លោះយោធានៅគ្រប់វិស័យ រួមទាំងដីគោក សមុទ្រ និងផ្លូវអាកាសទាំងអស់ ជាពិសេសនឹងដាក់ពង្រាយកងកម្លាំងប្រដាប់អាវុធដ៏មានឥទ្ធិពល និងឧបករណ៍យោធាប្រភេទថ្មីនៅក្នុងតំបន់ព្រំដែនផងដែរ ។

គួរបញ្ជាក់ថា ការបាញ់បង្ហោះនេះ គឺបានកើតឡើងលឿនជាងការរំពឹងទុក ដែលទីក្រុងព្យុងយ៉ាងបានជូនដំណឹងដល់ប្រទេសជប៉ុន ។ ដំបូងឡើយ កូរ៉េខាងជើង បានផ្តល់ព័ត៌មានទៅទីក្រុងតូក្យូថា ខ្លួនអាចនឹងបាញ់បង្ហោះផ្កាយរណបចារកម្មមិនឲ្យផុតថ្ងៃទី៣០ ខែវិច្ឆិកានោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ បញ្ជីឈ្មោះចំណាប់ខ្មាំងក្រុមទី ៥ ដែលត្រៀមដោះលែង ធ្លាក់ទៅដល់ដៃ អ៊ីស្រាអែល ហើយ