សេតវិមាន បារម្ភខ្លាំង ក្រោយលោក ត្រាំ ប្រកាសចង់ក្លាយខ្លួនជា ជនផ្តាច់ការ

មន្ត្រីសេតវិមានបាននិយាយកាលពីថ្ងៃចន្ទទី១១ ខែធ្នូថា ប្រធានាធិបតីអាមេរិកលោក ចូ បៃដិន កំពុងបារម្ភនិងធ្វើការដើម្បីប្រឆាំង ការគំរាមកំហែងលទ្ធិប្រជាធិបតេយ្យដែលអាមេរិកមិនធ្លាប់ជួបប្រទះសោះពីមុនមក។ នេះគឺជាការឆ្លើយតបទៅនឹង សេចក្តីអត្ថាធិប្បាយរបស់លោក ដូណាល់ ត្រាំ ដែលថា លោកចង់ក្លាយជា ជនផ្តាច់ការមួយថ្ងៃ ប្រសិនបើជាប់ឆ្នោតអាណត្តិទីពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងសុន្ទរកថាកាលពីថ្ងៃអាទិត្យ លោក ត្រាំ បានបញ្ជាក់ជាថ្មីនូវសេចក្តីថ្លែងការណ៍ដែលលោកធ្វើឡើងជាមួយទូរទស្សន៍ Fox News កាលពីសប្តាហ៍មុនថា លោកមិនមានបំណងក្លាយជាជនផ្តាច់ការទេ ប្រសិនបើឈ្នះតំណែងប្រធានាធិបតីម្តងទៀត ប៉ុន្តែប្រហែលជាអាចធ្វើមួយថ្ងៃ។

លោក ត្រាំ បានប្រាប់ពិធីជួបជុំប្រចាំឆ្នាំ New York Young Republican Club ថា “ខ្ញុំបាននិយាយថា ខ្ញុំចង់ក្លាយជាជនផ្តាច់ការមួយថ្ងៃ ហើយអ្នកដឹងទេថា ហេតុអ្វីបានជាខ្ញុំចង់ក្លាយជាជនផ្តាច់ការ? នោះគឺដោយសារខ្ញុំចង់បានជញ្ជាំងមែនទេ? ខ្ញុំចង់បានជញ្ជាំង ហើយខ្ញុំចង់ខួង ខួង ខួង”។

នៅពេលសួរអំពីការអត្ថាធិប្បាយរបស់លោក ត្រាំ, អ្នកនាំពាក្យសេតវិមានលោក Andrew Bates និយាយថា លោក បៃដិន កំពុងធ្វើការដើម្បីការពារលទ្ធិប្រជាធិបតេយ្យអាមេរិក និងដើម្បីបង្រួបបង្រួមប្រជាជនដែលមានទស្សនៈនយោបាយ ប្រឆាំងនឹងការគំរាមកំហែងបែបនេះ។

លោក ត្រាំ ដែលជាបេក្ខជននាំមុខខាងគណបក្សសាធារណរដ្ឋ បានសន្យាជាញឹកញាប់ថា នឹងសងសឹកប្រឆាំងគូប្រជែងនយោបាយ ប្រសិនបើលោកឡើងកាន់តំណែងម្តងទៀត។

លោកបានដាក់ចេញគោលនយោបាយមួយចំនួន ហើយអ្វីដែលគេចាប់អារម្មណ៍ខ្លាំង គឺលោកបានប្រកាសដកសហរដ្ឋអាមេរិក ចេញពីអង្គការណាតូ និងលុបចោលកិច្ចព្រមព្រៀងពាណិជ្ជកម្មអាស៊ីប៉ាស៊ីហ្វិក ក៏ដូចជាការសាងសង់ជញ្ជាំងនៅព្រំដែនជាប់ប្រទេសម៉ិកស៊ិក។

ជញ្ជាំងនេះ គឺជាផ្នែកដ៏ធំមួយនៃគោលនយោបាយរបស់លោក ត្រាំ ចាប់តាំងពីឆ្នាំ២០១៦មកម្ល៉េះ ប៉ុន្តែក្រោយពេលលោក បៃដិន ជាប់ឆ្នោត ការសាងសង់នេះ ត្រូវបានផ្អាកពាក់កណ្តាលទី៕

ប្រែសម្រួល៖ Vann Vann

ប្រភព៖ CNA

ចុចអាន៖ មិនទាន់ជាប់ឆ្នោតផង លោក ត្រាំ ប្រកាសដកអាមេរិក ចេញពីស្ថាប័ននិងកិច្ចព្រមព្រៀងធំៗបាត់ទៅហើយ