មេយោធា អាមេរិក និងចិន និយាយគ្នាតាមវីដេអូខលរឿងសន្តិសុខក្នុងតំបន់ និងលើពិភពលោក

មន្ត្រីយោធាកំពូលរបស់សហរដ្ឋអាមេរិក និងចិនកាលពីថ្ងៃព្រហស្បតិ៍បានបើកកិច្ចប្រជុំតាមរយៈវីដេអូខល ហើយក៏ជាកិច្ចសន្ទនាលើកដំបូងផងដែររវាងភាគីទាំងពីរក្នុងរយៈពេលជាង ១ ឆ្នាំ ក្រោយមានជម្លោះ ក៏ដូចជាបញ្ហាជាប់គាំងជាច្រើនក្នុងរយៈពេលប៉ុន្មានឆ្នាំមកនេះ ។

យោងតាមសារព័ត៌មាន Global Times បានរាយការណ៍ថា ក្នុងជំនួបនោះលោកឧត្តមសេនីយ៍ Charles Brown ដែលជាប្រធានអគ្គសេនាធិការចម្រុះរបស់កងទ័ពអាមេរិក និងលោកឧត្តមសេនីយ៍ Liu Zhenli មេបញ្ជាការកងទ័ពរំដោះប្រជាជនចិន បានពិភាក្សាគ្នាអំពីបញ្ហាសន្តិសុខពិភពលោក និងបញ្ហាក្នុងតំបន់មួយចំនួនផងដែរ ។

នៅដើមដំបូងនៃកិច្ចសន្ទនានោះ លោក Liu បានលើកឡើងថា “សំណួរអំពីកោះតៃវ៉ាន់ គឺជាកិច្ចការផ្ទៃក្នុងសុទ្ធសាធរបស់ប្រទេសចិន ដែលមិនអនុញ្ញាតឲ្យមានការជ្រៀតជ្រែកពីសំណាក់ប្រទេសខាងក្រៅនោះឡើយ ហើយ​អាមេរិក​គួរតែ​គោរព​អធិបតេយ្យភាព​ដែនដី និង​សិទ្ធិ​ដែនសមុទ្រ​របស់​ចិន​នៅ​សមុទ្រ​ចិន​ខាងត្បូង” ។

ទោះយ៉ាងណា លោក Brown មិនបានឆ្លើយតបអ្វីជាដុំកំភួននោះឡើយ ពោលលោកឧត្តមសេនីយ៍គ្រាន់តែលើកឡើងពីសារៈសំខាន់នៃការចូលរួមក្នុងកិច្ចសន្ទនាសំខាន់ៗរបស់កងទ័ពរំដោះប្រជាជនចិនដើម្បីកាត់បន្ថយ ក៏ដូចជាទប់ស្កាត់កុំឲ្យមានការយល់ច្រឡំណាមួយផ្ទុះឡើង ។

ទន្ទឹមនោះ នៅក្នុងសេចក្តីថ្លែងការណ៍ពីការិយាល័យរបស់លោក Brown បានឲ្យដឹងថា ភាគីទាំងពីរក៏បានពិភាក្សាអំពីសារៈសំខាន់នៃការធ្វើការរួមគ្នាដើម្បីគ្រប់គ្រងការប្រកួតប្រជែងប្រកបដោយការទទួលខុសត្រូវ ចៀសវាងការគិតខុស ក៏ដូចជារក្សាទំនាក់ទំនងបើកចំហ និងដោយផ្ទាល់ផងដែរ” ។

គួរបញ្ជាក់ថា ជំនួបរវាងមន្ត្រីយោធាកំពូលរបស់ប្រទេសទាំងពីរកើតមានឡើង បន្ទាប់ពីប្រធានាធិបតី Joe Biden និងប្រធានាធិបតីចិន Xi Jinping បានឯកភាពគ្នាកាលពីខែមុន ក្នុងអំឡុងកិច្ចពិភាក្សានៅរដ្ឋកាលីហ្វ័រញ៉ាថា យោធាភាគីត្រូវការស្ដារទំនាក់ទំនងឡើងវិញ ក្រោយមានបញ្ហាប្រទាំងប្រទើសស ដោយសារតែដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះតៃវ៉ាន់កាលពីខែសីហា ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក ស៊ី ជីនពីង ប្រាប់លោក បៃដិន ថា ចិន នឹងបង្រួបបង្រួមជាមួយ តៃវ៉ាន់ ឡើងវិញ