អាមេរិក ដាក់គុក កងទ័ពជើងទឹកម្នាក់ ព្រោះយកការណ៍ឲ្យ ចិន ជាថ្នូរនឹងប្រាក់

កងទ័ពជើងទឹកអាមេរិកមួយរូប នៅមូលដ្ឋានរដ្ឋកាលីហ្វ័រញ៉ា ត្រូវបានកាត់ទោសដាក់ពន្ធនាគារជាង២ឆ្នាំ បន្ទាប់ពីសារភាពទោសកំហុសថា បានផ្តល់ព័ត៌មានយោធារសើបទៅឲ្យប្រទេសចិន ជាថ្នូរនឹងប្រាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wenheng Zhao អាយុ២៦ឆ្នាំ បានទទួលស្គាល់ទោសកំហុសកាលពីខែតុលាថា គាត់ពិតជាបានប្រគល់ព័ត៌មានទៅឲ្យចារកម្មចិនមែន ជាថ្នូរនឹងប្រាក់ ហើយតាមការបញ្ជាក់ពីមន្ត្រីអាមេរិក, គាត់បានបញ្ជូនព័ត៌មានអំពីសមយុទ្ធយោធា សកម្មភាពប្រតិបត្តិការ និងហេដ្ឋារចនាសម្ព័ន្ធសំខាន់ៗទៅឲ្យចិនចន្លោះឆ្នាំ២០២១ដល់ឆ្នាំ២០២៣។

រឿងធំបំផុតគឺថា គាត់បានផ្តល់ព័ត៌មានលម្អិតអំពីសមយុទ្ធយោធាទ្រង់ទ្រាយធំរបស់កងទ័ពជើងទឹកអាមេរិក នៅតំបន់ឥណ្ឌូប៉ាស៊ីហ្វិក ក៏ដូចជាដ្យាក្រាមអគ្គិសនី និងប្លង់មេសម្រាប់ប្រព័ន្ធរ៉ាដា ដែលមានទីតាំងនៅមូលដ្ឋានអាមេរិ លើកោះអូគីណាវ៉ារបស់ជប៉ុន ផងដែរ។

យោងតាមក្រសួងយុត្តិធម៌អាមេរិក, លោក Zhao បានចូលទៅក្នុងបន្ទាយទាហាន និងមូលដ្ឋានកងទ័ពជើងទឹកដែលមានការយាមកាមតឹងរ៉ឹង ដើម្បីប្រមូលនិងកត់ត្រាព័ត៌មាន។

គាត់ក៏ចេះវិធីសាស្រ្តទំនើបៗដើម្បីបញ្ជូនព័ត៌មាន បំផ្លាញព័ស្តុតាង និងលាក់បាំងទំនាក់ទំនងរបស់គាត់ជាមួយចារកម្មចិនផងដែរ។ ចិនបានផ្តល់ប្រាក់ឲ្យគាត់ចំនួន១៤ដង ចន្លោះខែសីហាឆ្នាំ២០២១ដល់ខែឧសភាឆ្នាំ២០២៣ ដោយសរុបទៅស្មើនឹងទឹកប្រាក់១៤៨៦៦ដុល្លារអាមេរិក។

សូមបញ្ជាក់ថា Zhao គឺជាជនជាតិអាមេរិក ដើមកំណើតចិន។ គាត់បានធ្វើអន្តោប្រវេសន៍ទៅសហរដ្ឋអាមេរិកក្នុងឆ្នាំ២០០៩ ហើយក្លាយជាពលរដ្ឋអាមេរិកនៅឆ្នាំ២០១២ និងបានចុះឈ្មោះក្នុងជួរកងទ័ពជើងទឹកនៅប្រាំឆ្នាំក្រោយមក។

គាត់ត្រូវបានចាប់ខ្លួនកាលពីខែសីហាឆ្នាំមុនក្នុងរដ្ឋកាលីហ្វ័រញ៉ា រួចក៏សារភាពកំហុសចំពោះការចោទប្រកាន់ពីបទចារកម្មនៅខែតុលា ហើយមកដល់ថ្ងៃអង្គារទី៩ខែមករាឆ្នាំ២០២៤ តុលាការរដ្ឋ​កាលីហ្វ័រញ៉ា ​ក៏បាន​កាត់​ទោស​គាត់​ឲ្យ​ជាប់​ពន្ធនាគារ២៧ខែតែម្តង៕

ប្រែសម្រួល៖ Vann Vann

ប្រភព៖ BBC

ចុចអាន៖ ចិនចាប់បានអត្តសញ្ញាណចារកិច្ចម្នាក់ ប្រមូលព័ត៌មានសម្ងាត់ឲ្យអង់គ្លេស