លោក ដូណាល់ ត្រាំ នឹងដំឡើងថ្លៃពន្ធលើទំនិញចិន លើសពី ៦០% ប្រសិនបើបានឈ្នះឆ្នោត

អតីតប្រធានាធិបតីអាមេរិក លោក ដូណាល់ ត្រាំ បាននិយាយថា លោកនឹងដាក់ពន្ធបន្ថែមលើទំនិញរបស់ចិន ប្រសិនបើលោកឈ្នះការបោះឆ្នោតអាមេរិកក្នុងខែវិច្ឆិកា ខាងមុខនេះ។នៅក្នុងបទសម្ភាសន៍ជាមួយ Fox News លោក ដូណាល់ ត្រាំ បាននិយាយយ៉ាងដូច្នេះថា ប្រសិនបើលោកជាប់ឆ្នោតជាប្រធានសធិបតី លោកនឹងដំឡើងពន្ធលើទំនិញចិន អាចលើសពី ៦០% ។ លោកសង្កត់ធ្ងន់ថា នឹងត្រូវតែធ្វើវាឱ្យបាន ។

លោក ដូណាល់ ត្រាំ បានចោទចិនជាយូរមកហើយថា ចិនបានអនុវត្តពាណិជ្ជកម្មមិនយុត្តិធម៌ រួមទាំងមានការលួចកម្មសិទ្ធិបញ្ញាទៀតផង ។

ក្នុងអំឡុងពេលកាន់តំណែងជាប្រធានាធិបតី បុរសវ័យ ៧៧ឆ្នាំរូបនេះ បានបង្កឱ្យមានសង្រ្គាមពាណិជ្ជកម្មដ៏ជូរចត់រវាងប្រទេសចិន និងអាមេរិក ខណៈដែលលោកបានដំឡើងពន្ធលើទំនិញចិនមានតម្លៃរាប់រយពាន់លានដុល្លារ។ រដ្ឋបាល លោក ត្រាំ បានចាប់ផ្តើមដាក់តម្លៃពន្ធលើទំនិញជាលើកដំបូងក្នុងគោលបំណងទប់ស្កាត់ការនាំចូលរបស់ចិននៅក្នុងឆ្នាំ ២០១៨ ហើយឆ្នាំបន្ទាប់ក៏បានដំឡើងថ្លៃពន្ធទៅលើប្រភេទអាហារសមុទ្រ និងសារធាតុគីមី ។

ជាមួយគ្នានេះ ទីក្រុងប៉េកាំង ក៏បានឆ្លើយតបដោយដំឡើងពន្ធលើការនាំចូលរបស់សហរដ្ឋអាមេរិក រួមទាំងសណ្តែកសៀង ស្រូវសាលី និងបសុបក្សី។

សូមបញ្ជាក់ថា សហរដ្ឋអាមេរិកគឺជាទីផ្សារនាំចេញដ៏ធំបំផុតរបស់ប្រទេសចិនអស់រយៈពេលជាងពីរទសវត្សរ៍មកហើយ។ទោះបីជាយ៉ាងណាក៏ដោយ ការទប់ស្កាត់ទំនាក់ទំនងសេដ្ឋកិច្ចរវាងសហរដ្ឋអាមេរិក និងចិន កំពុងទទួលបានការគាំទ្រពីសមាជិកសភាមកពីគណបក្សសាធារណរដ្ឋ និងគណបក្សប្រជាធិបតេយ្យមួយចំនួន។ របាយការណ៍គណៈកម្មាធិការសភាកាលពីពេលថ្មីៗនេះបានផ្តល់អនុសាសន៍ឱ្យដំឡើងពន្ធខ្ពស់លើការនាំចូលពីប្រទេសចិន និងការរឹតបន្តឹងលើការវិនិយោគរបស់ចិននៅសហរដ្ឋអាមេរិក ៕

ប្រែសម្រួលដោយ÷ ប៉ោ កុសល

ប្រភព÷ BBC