កូនស្រីពៅលោក Thaksin រៀបចំផ្ទះត្រៀមទទួលឪពុកត្រឡប់មកវិញ

លោកស្រី Pae Thongthan Shinawatra មេដឹកនាំគណបក្សភឿថៃ (PAT) និងជាកូនស្រីពៅរបស់លោក Thaksin Shinawatra កំពុងមានក្ដីសង្ឃឹមយ៉ាងមុតមាំថា ឪពុករបស់ខ្លួននឹងមានឈ្មោះលើតារាងព្យួរទោសពិសេស ក្រោមហេតុផលចាស់ជរា (អាយុលើសពី៧០ឆ្នាំ) និងកំពុងមានបញ្ហាសុខភាពធ្ងន់ធ្ងរ។

យោងតាមប្រភពពីសារព័ត៌មាន Khaosod បានឱ្យដឹងថា សេចក្ដីប្រកាសដែលបង្ហាញអំពីឈ្មោះ អ្នកទោសដែលនឹងត្រូវព្យួរ នឹងធ្វើឡើងនៅថ្ងៃទី១៨ ខែកុម្ភៈ ខាងមុខនេះ ហើយក្នុងនោះគេក៏រំពឹងថា លោក Thaksin ដែលកំពុងមានវ័យ ៧៤ ឆ្នាំ ហើយកំពុងមានជំងឺទៀតនោះ ក៏អាចនឹងត្រូវបានដោះលែងឱ្យមករស់នៅជុំគ្រួសារផងដែរ ។

ទាក់ទងនឹងព័ត៌មានមួយនេះ លោកស្រី Pae Thongthan Shinawatra បាននិយាយថា ក្រុមគ្រួសារលោកស្រីបានទទួលការសម្របសម្រួលពីនាយកដ្ឋានកែសម្រួល និងលោកវរសេនីយ៍ឯក Thawee Sodsong រដ្ឋមន្ត្រីក្រសួងយុត្តិធម៌ រួចហើយចំពោះសំណើរព្យួរទោសលោក Thaksin ឱ្យរស់នៅក្រៅឃុំ ប៉ុន្តែសម្រាប់នៅថ្ងៃទី១៨ ខាងមុខនេះ នឹងមានឈ្មោះលោកនៅក្នុងបញ្ជីព្យួរទោសពិសេសឬយ៉ាងណានោះ ក្រុមគ្រួសារនៅមិនទាន់បានទទួលដំណឹងឡើយ ។

យ៉ាណាមិញសម្រាប់លោកស្រី Pae Thongthan Shinawatra សង្ឃឹមថា ឪពុករបស់លោកស្រីអាចនឹងមានលក្ខខណ្ឌសមស្របដើម្បីទទួលយកការព្យួរទោស ខណ:ដែលពេលនេះក្រុមគ្រួសារ ក៏បានរៀបចំផ្ទះដើម្បីទទួលលោក Thaksin រួចហើយដែរ ។

សូមរំឭកថា លោក Thaksin Shinawatra ដែលជាអតីតនាយករដ្ឋមន្ត្រីដ៏មានឥទ្ធិពលពីឆ្នាំ ២០០១-២០០៦ បានវិលត្រឡប់ចូលមាតុប្រទេសវិញ កាលពីខែសីហា ឆ្នាំ២០២៣ បន្ទាប់ពីការនិរទេសខ្លួនឯងអស់រយៈពេល ១៥ ឆ្នាំ គេចពីការកាត់ទោសឱ្យជាប់ពន្ធនាគាររយៈពេល ៨ ឆ្នាំ ពីបទរំលោភអំណាច ។

មហាសេដ្ឋីរូបនេះកំពុងត្រូវបានឃុំខ្លួននៅ មន្ទីរពេទ្យក្នុងប្រទេសថៃ ដោយសារបញ្ហាសុខភាព ហើយជាក់ស្ដែងលោក Thaksin មិនទាន់បានចូលសម្រាកនៅក្នុងពន្ធនាគារសូម្បីតែមួយយប់នៅឡើយទេ ៕

ប្រែសម្រួលដោយ÷ ប៉ោ កុសល

ប្រភព÷ Khaosod