ហ្វីលីពីន ​ប្តេជ្ញា​គោរព​ក្រម​ប្រតិបត្តិ​សមុទ្រ​ចិន​ខាងត្បូង

រដ្ឋមន្ត្រីការបរទេសហ្វីលីពីនបាននិយាយនៅថ្ងៃព្រហស្បតិ៍ថា ប្រទេសហ្វីលីពីនបានប្តេជ្ញាចិត្តយ៉ាងមុតមាំក្នុងការចរចាដោយសន្តិវិធីជាមួយប្រទេសចិន និងបណ្តាប្រទេសអាស៊ីអាគ្នេយ៍ ដើម្បីបញ្ចៀសការប្រឈមមុខដាក់គ្នានៅក្នុងសមុទ្រចិនខាងត្បូង ។ នេះ​បើយោងតាមការចេញផ្សាយរបស់សារពត៌មាន Reuters នៅថ្ងៃទី១៥​ ខែ​កុម្ភៈនេះ ។

រដ្ឋមន្ត្រីការបរទេស លោក Enrique Manalo បាននិយាយថា ភាពតានតឹងនៅសមុទ្រចិនខាងត្បូង មិនមែនសុទ្ធតែនិយាយអំពីការប្រជែងគ្នារវាងប្រទេសមហាអំណាចដូចជា សហរដ្ឋអាមេរិក និងចិននោះទេ ហើយហ្វីលីពីន និងប្រទេសដទៃទៀតក៏មានសិទ្ធិ និងផលប្រយោជន៍ស្របច្បាប់ដើម្បីគាំទ្រលើរឿងនេះផងដែរ ហើយលោកក៏បានសម្តែងក្ដីព្រួយបារម្ភអំពីភាពតានតឹងក្នុងតំបន់ជុំវិញកោះតៃវ៉ាន់ និងបានជំរុញឲ្យភាគីទាំងអស់រក្សាទំនាក់ទំនងដោយផ្ទាល់ ។

គំនិតនៃការចរចារនេះ ត្រូវបានញាស់ជាងទសវត្សរ៍មុន ប៉ុន្តែភាគីសងខាងបានត្រឹមតែប្តេជ្ញាចិត្តប៉ុណ្ណោះ ហើយក៏មានការវិវឌ្ឍន៍តិចតួចផងដែរ ។ ទីក្រុងម៉ានីលបានចោទប្រកាន់ទីក្រុងប៉េកាំងថាបានប្រព្រឹត្តអំពើឈ្លានពានម្តងហើយម្តងទៀតនៅក្នុងដែនទឹកតំបន់សេដ្ឋកិច្ចរបស់ខ្លួន ខណៈចិនចោទហ្វីលីពីនពីបទរំលោភបំពានទឹកដីរបស់ខ្លួន ។

បញ្ហានេះមានភាពរសើបខ្លាំង ដោយប្រទេសជិតខាងរបស់ចិនចង់ផ្អែកលើក្រមច្បាប់អន្តរជាតិ ដែលទីក្រុងប៉េកាំងត្រូវបានចោទប្រកាន់ម្តងហើយម្តងទៀតថា មិនយកចិត្តទុកដាក់ក្នុងការអះអាងការទាមទាររបស់ខ្លួនចំពោះអធិបតេយ្យភាពលើ ៩០ ភាគរយនៃសមុទ្រចិនខាងត្បូង បើទោះបីជាត្រូវបានច្រានចោលដោយតុលាការអាជ្ញាកណ្តាលអន្តរជាតិក៏ដោយ ។

គួរបញ្ជាក់ថា ជម្លោះកាន់តែតានតឹងឡើង នៅពេលដែលហ្វីលីពីនបានបង្កើនការចូលរួមផ្នែកការពារជាតិជាមួយសហរដ្ឋអាមេរិក រួមទាំងការពង្រីកការចូលទៅកាន់មូលដ្ឋានរបស់ខ្លួន និងសមយុទ្ធយោធាជាបន្តបន្ទាប់ ក៏ដូចជាការល្បាតនៅសមុទ្រដែលធ្វើឲ្យទីក្រុងប៉េកាំងព្រួយបារម្ភ៕

អត្ថបទ ៖ ប៊ុន​ សុភាព