អនាគតប្រធានាធិបតី តៃវ៉ាន់ ចាប់ផ្ដើមចាត់ចែងតួនាទីមន្ត្រីសំខាន់ៗក្នុងជួរ​រដ្ឋាភិបាលថ្មី

បន្ទាប់ពីឈ្នះឆ្នោតយ៉ាងភ្លូកទឹកភ្លូកដីកាលពីពាក់កណ្ដាលខែមករាមក ពេលនេះអនាគតប្រធានាធិបតីរបស់តៃវ៉ាន់លោក Lai Ching-te ចាប់ផ្ដើមចាត់ចែង ក៏ដូចជាតែងតាំងមន្ត្រីសំខាន់ៗក្នុងមុខតំណែងចំនួន ៨ សម្រាប់ជួររដ្ឋាភិបាលថ្មីរបស់លោក មុនពេលចូលកាន់តំណែងនាខែក្រោយ ។ នេះបើយោងតាមការចេញផ្សាយដោយសារព័ត៌មាន Focus Taiwan កាលពិថ្ងៃទី២៥ ខែមេសាកន្លងទៅ ។

ថ្លែងក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ ប្រធានាធិបតីជាប់ឆ្នោតវ័យ ៦៥ ឆ្នាំរូបនេះបានប្រកាសតែងតាំងលោក Joseph Wu ដែលជារដ្ឋមន្ត្រីការបរទេសបច្ចុប្បន្ន ឲ្យកាន់ការជាប្រធានក្រុមប្រឹក្សាសន្តិសុខជាតិ (NSC) ខណៈតំណែងមួយនេះលោកក៏ធ្លាប់ក្ដោបក្ដាប់ម្ដងរួចទៅហើយផងដែរ អំឡុងពេលអាណត្តិដំបូងរបស់ប្រធានាធិបតីលោកស្រី Tsai Ing-wen ។

ចំណែកលោក Wellington Koo ដែលបច្ចុប្បន្នកំពុងកាន់ចង្កូតនាវាក្រុមប្រឹក្សាសន្តិសុខជាតិ នឹងឡើងតំណែងមួយកាំទៀតជារដ្ឋមន្ត្រីការពារជាតិ ខណៈលោកបានបម្រើការជាប្រធានក្រុមប្រឹក្សាមួយនេះ ចាប់តាំងពីការចាប់ផ្តើមអាណត្តិទីពីររបស់លោកស្រី Tsai មកម្ល៉េះ ។

ក្នុងតំណែងកំពូលមួយនេះ លោក Wellington Koo បានទៅបំពេញទស្សនកិច្ចនៅសហរដ្ឋអាមេរិកជាមួយលោក Joseph Wu កាលពីខែកុម្ភៈឆ្នាំមុន ហើយបានជួបជាមួយមន្ត្រីជាន់ខ្ពស់នៃក្រសួងការបរទេស និងក្រសួងការពារជាតិសហរដ្ឋអាមេរិក ខណៈឯលោក Lin Chia-lung វិញនឹងបន្តតំណែងជាមន្ត្រីការទូតកំពូលរបស់តៃវ៉ាន់ដដែល ។

ដោយឡែកមួយរូបទៀតគឺលោក Chiu Chui-cheng នឹងក្លាយជាប្រធានក្រុមប្រឹក្សាកិច្ចការដីគោក ដែលក្ដោបក្ដាប់វិធានការលើប្រទេសចិន ។ លោកបានបម្រើការជាអនុប្រធានក្រុមប្រឹក្សាមួយនេះអស់រយៈពេលជិត ៧ ឆ្នាំ រហូតដល់ឆ្នាំ ២០២៣ ក្រោមគោលនយោបាយរបស់លោកស្រី Tsai ដែលថា “តៃវ៉ាន់នឹងមិនបង្កហេតុ ហើយមិនចុះចាញ់នឹងសម្ពាធណាមួយពីរដ្ឋាភិបាលទីក្រុងប៉េកាំងឡើយ” ។

គួរបញ្ជាក់ថា លោក Lai Ching-te បានឈ្នះការបោះឆ្នោតភ្លូកទឹកភ្លូកដីកាលពីថ្ងៃទី១៣ ខែមករា ឆ្នាំ២០២៤ កន្លងទៅ ហើយលោកនឹងស្បថចូលកាន់តំណែងជំនួសប្រធានាធិបតីផុតអាណត្តិ Tsai Ing-wen នាថ្ងៃទី២០ ខែឧសភា ខណៈមេដឹកនាំមកពីគណបក្សវឌ្ឍនភាពប្រជាធិបតេយ្យតៃវ៉ាន់ (DPP) រូបនេះត្រូវចិនចាត់ទុកជាអ្នកបំផ្លាញសន្តិភាព និងជាមនុស្សគ្រោះថ្នាក់ ដោយសារតែគោលនយោបាយយកអាមេរិកជាខ្នងបង្អែកការពារច្រកសមុទ្រតៃវ៉ាន់ដែលកំពុងមានជម្លោះ ៕

ដោយ ៖ សុខ ជីវ័ន្ត

ចុចអាន ៖ ចិន គំរាមអាមេរិក ក្រោយនាំមីស៊ីលមក អាស៊ីប៉ាស៊ីហ្វិក