ព័ត៌មានអន្ដរជាតិ

អាមេរិកជះលុយ ១៣ពាន់លានដុល្លារ ផលិតយន្តហោះត្រៀមសម្រាប់សង្គ្រាមនុយក្លេអ៊ែរ

បានផុស

១ year មុន

នៅ

ថ្ងៃចន្ទ ២៩ មេសា ២០២៤

ដោយ

Chheang

ទឹកប្រាក់ទំហំ ១៣ពាន់លានដុល្លារ ត្រូវបានសហរដ្ឋអាមេរិកប្រគល់ឲ្យក្រុមហ៊ុន Sierra Nevada Corp សម្រាប់គម្រោងអភិវឌ្ឍប្រភេទយន្តហោះយោធាថ្មី ដែលមានសមត្ថភាពអាចប្រើប្រាស់នៅក្នុងសង្គ្រាមនុយក្លេអ៊ែរបាន។ គម្រោងអភិវឌ្ឍនេះ មានឈ្មោះថា “Survivable Airborne Operterations Center” ឬហៅកាត់ថា SAOC។ នេះបើយោងតាមសេចក្ដីប្រកាសរបស់កងទ័ពដែនអាកាសអាមេរិក កាលពីថ្ងៃទី២៦ ខែមេសាកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោង SAOC នឹងផលិតយន្តហោះយោធាថ្មី ដាក់ឈ្មោះថា “Doomsday” និងមានរូបរាងយកគំរូតាមប្រភេទយន្តហោះពាណិជ្ជកម្ម ហើយវានឹងត្រូវប្រើជំនួសក្រុមយន្តហោះចាស់ “E-4B” ដែលផលិតនិងប្រើតាំងតែពីទសវត្សទី៧០កន្លងមក។ កិច្ចការនៃគម្រោង SAOC នឹងធ្វើឡើងនៅក្នុងតំបន់ Colorado តំបន់ Nevada និងរដ្ឋ Ohio ដោយគ្រោងបញ្ចប់ឲ្យរូចរាល់ត្រឹមថ្ងៃទី១០ ខែកក្កដា ឆ្នាំ២០៣៦ខាងមុខ។

ស្របគ្នាជាមួយការបង្កើតគម្រោង SAOC សហរដ្ឋអាមេរិកក៏បានផ្ដល់ប្រាក់ ៥៩លានដុល្លារឲ្យទៅខាងកងទ័ពដែនអាកាសផងដែរ សម្រាប់ការស្រាវជ្រាវ អភិវឌ្ឍន៍ ការតេស្តសាកល្បង និងការធ្វើការវាយតម្លៃទៅលើមូលនិធិដែលបានចំណាយលើក្រុមហ៊ុន Sierra Nevada។

អ្នកនាំពាក្យរបស់កងទ័ពដែនអាកាសអាមេរិក បានប្រាប់ថា “ការអភិវឌ្ឍប្រព័ន្ធអាវុធសន្តិសុខជាតិដ៏សំខាន់ ដែលធានាបាននូវសមត្ថភាពបញ្ជា គ្រប់គ្រង និងទំនាក់ទំនងនុយក្លេអ៊ែររបស់នាយកដ្ឋាន គឺមានការពាក់ព័ន្ធនឹងប្រតិបត្តិការ និងសុវត្ថិភាពសម្រាប់ប៉ុន្មានទសវត្សទៅមុខទៀត”។

សូមបញ្ជាក់ថា បច្ចុប្បន្ន យន្តហោះ “E-4B” កំពុងហោះហើរនៅលើដែនអាកាសអាមេរិកគ្រប់ពេលតែម្ដង ដោយវាមានមុខងារពិសេសសម្រាប់អនុញ្ញាតឲ្យប្រធានាធិបតីអាមេរិកអាចបញ្ជាកងកម្លាំងដោយផ្ទាល់បាន បើទោះជាសង្គ្រាមនុយក្លេអ៊ែរផ្ទុះឡើង ឬក្នុងលក្ខខណ្ឌដែលប្រព័ន្ធផ្ដល់ដំណឹងនិងប្រកាសអាសន្ននៅលើដីគោកត្រូវបានកម្ទេច៕

ដោយ៖ ឈាង

Related Topics:សហរដ្ឋអាមេរិក