ក្រោយបានជំនួយ លោក ហ្សេលេនស្គី តឿនអាមេរិក ជួយដឹកឲ្យលឿនបន្តិចមក

ក្រោយសហរដ្ឋអាមេរិក អនុម័តកញ្ចប់ជំនួយក្នុងទំហំដ៏ធំសម្រាប់អ៊ុយក្រែន លោកប្រធានាធិបតី វ្ល៉ាឌីមៀរ ហ្សេលេនស្គី បាននិយាយថា ត្បិតតែជំនួយខ្លះបានមកដល់ដីអ៊ុយក្រែនក៏ពិតមែន ប៉ុន្តែលោកតឿនឲ្យទីក្រុងវ៉ាស៊ីនតោន ដឹកជំនួយឲ្យបានលឿនបន្តិចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC កាលពីថ្ងៃចន្ទទី២៩ខែមេសា លោក ហ្សេលេនស្គី លើកឡើងថា ដោយសារតែការដឹកសព្វាវុធយឺតយ៉ាវនេះហើយ ទើបធ្វើឲ្យរុស្ស៊ី បានដៃវាយសន្ធាប់នៅសមរភូមិជួរមុខ។

ក្នុងសន្និសីទសារព័ត៌មាននៅទីក្រុងកៀវ លោកហ្សេលេនស្គីនិយាយថា “ឥឡូវ កងទ័ពរុស្ស៊ីកំពុងព្យាយាមទាញយកប្រយោជន៍ពីស្ថានភាព ដែលយើងកំពុងរង់ចាំការផ្គត់ផ្គង់ពីដៃគូ ជាពិសេសពីសហរដ្ឋអាមេរិកតែម្តង។ នោះហើយជាមូលហេតុដែលយើងសូមជំរុញឲ្យមានការដឹកជំនួយសព្វាវុធ ឲ្យបានលឿនបន្តិច។

ការជំរុញរបស់លោក កើតឡើងបន្ទាប់ពីអាជ្ញាធរនៅកំពង់ផែសមុទ្រខ្មៅ Odesa និយាយថា មីស៊ីលរុស្ស៊ីមួយគ្រាប់ បានសម្លាប់មនុស្ស៤នាក់ និងរបួស៣២នាក់។

ប្រធានតំបន់ Odesa លោក Oleh Kiper អះអាងថា ស្ត្រី៣នាក់ និងបុរសម្នាក់ត្រូវបាត់បង់ជីវិត ហើយអ្នករបួសរួមមានក្មេងអាយុ៤ឆ្នាំម្នាក់ និង១៦ឆ្នាំម្នាក់ ព្រមទាំងស្ត្រីមានផ្ទៃពោះផងដែរ។ លើសពីនេះ ផ្ទះ​ប្រជាពលរដ្ឋ និង​ហេដ្ឋារចនាសម្ព័ន្ធ​ត្រូវ​រងការខូចខាតថែមទៀត។

ស្របពេលជាមួយគ្នានោះដែរ នៅព្រឹកថ្ងៃចន្ទ រុស្ស៊ីប្រកាសថា ខ្លួនដណ្តើមបានភូមិទីពីរត្រឹមរយៈពេលពីរថ្ងៃ នៃប្រតិបត្តិការវាយលុករបស់ខ្លួននៅភាគខាងកើតប្រទេសអ៊ុយក្រែន។

ដោយឡែក តាមការបញ្ជាក់ពីមេបញ្ជាការអ៊ុយក្រែនលោក Oleksandr Syrskyi, ស្ថានភាពនៅសមរភូមិជួរមុខកាន់តែអាក្រក់ទៅៗហើយ ចំពេលមានការវាយប្រហារជាច្រើនលើកច្រើនសារបស់រុស្ស៊ី ហើយកងកម្លាំងអ៊ុយក្រែនក៏បានដកថយចេញពីទីតាំងនៅក្នុងតំបន់ Donetsk ភាគខាងកើតទៅទៀត។

ដោយសារតែស្ថានភាពកាន់តែយ៉ាប់យ៉ឺនបែបនេះហើយ ទើបអ៊ុយក្រែន បានប្រកូកប្រកាសម្តងហើយម្តងទៀតសុំជំនួយឲ្យបានលឿន ព្រោះមិនអាចបណ្តែតបណ្តោយឲ្យរុស្ស៊ីបានដៃ សម្រុកវាយប្រហារបានឡើយ។

សូមបញ្ជាក់ថា គិតត្រឹមពេលនេះ រដ្ឋបាលលោក បៃដិន បានជះលុយជួយអ៊ុយក្រែន អស់ប្រមាណ១១៣ពាន់លានដុល្លាររួចទៅហើយ ចាប់តាំងពីជម្លោះជាមួយរុស្ស៊ី ផ្ទុះឡើងក្នុងខែកុម្ភៈឆ្នាំ២០២២ ហើយនៅសប្តាហ៍នេះលោក ហ្សេលេនស្គី ថែមទាំងបង្ហាញបំណងចង់ឲ្យអាមេរិក ជួយទីក្រុងកៀវ ១០ឆ្នាំទៀតផងដែរ៕

អត្ថបទ៖ សុខ សុវណ្ណ

ចុចអាន៖ លោក ហ្សេលេនស្គី ចង់ឲ្យអាមេរិក ជួយ១០ឆ្នាំទៀត