ទឹកជំនន់និងបាក់ដី វាយប្រហារកោះ Sulawesi ឥណ្ឌូណេស៊ី ឆក់ជីវិតមនុស្ស ១៤ នាក់

ទឹកជំនន់ និងការបាក់ដីលើកោះ Sulawesi ប្រទេសឥណ្ឌូណេស៊ីសម្លាប់មនុស្ស ១៤ នាក់ ខណៈភ្លៀងធ្លាក់យ៉ាងគំហុកបានវាយលុកតំបន់នេះចាប់តាំងពីថ្ងៃព្រហស្បតិ៍សប្ដាហ៍មុន ។ នេះបើយោងតាមការចេញផ្សាយរបស់សារពត៌មាន AP នៅថ្ងៃទី ០៥ ខែ​ឧសភានេះ។

ភ្លៀងធ្លាក់យ៉ាងគំហុកបានវាយលុកតំបន់នេះចាប់តាំងពីថ្ងៃព្រហស្បតិ៍ បានបង្កឱ្យមានការបាក់ដីនៅក្នុងស្រុក Luwu ក្នុងខេត្ត South Sulawesi ។ ទឹកជំនន់នេះមានកំពស់រហូតដល់ ៣ ម៉ែត្រ បានប៉ះពាល់ដល់ក្នុងស្រុកចំនួន ១៣ ខណៈដែលទឹក និងភក់បានគ្របដណ្តប់តំបន់នោះនិងមានផ្ទះ​ជាង​១.០០០​ខ្នង​បាន​រង​ផល​ប៉ះ​ពាល់​ក្នុង​នោះ​៤២ខូតខាតទាំងស្រុង​។ ចំណែកក្រុមជួយសង្គ្រោះបានជួយ អ្នកស្រុករាប់រយនាក់ទៅវិហារអ៊ីស្លាម ឬផ្ទះសាច់ញាតិនៅខាងក្រៅតំបន់រងគ្រោះ។

គួរបញ្ជាក់ថាភ្លៀងធ្លាក់ខ្លាំងបានបណ្ដាលឱ្យមានការបាក់ដី និងទឹកជំនន់ជាញឹកញាប់នៅក្នុងប្រទេសឥណ្ឌូនេស៊ី ដែលជាប្រជុំនៃកោះចំនួន ១៧,០០០ ខណៈភ្លៀងធ្លាក់ខ្លាំងកាលពីខែមេសា បានបង្កឱ្យមានការបាក់ដី និងបានសម្លាប់មនុស្ស ២០ នាក់នៅក្នុងស្រុក Tana Toraja នៃខេត្ត Sulawesi ភាគខាងត្បូង៕

អត្ថបទ៖ ប៊ុន សុភាព