ព័ត៌មានអន្ដរជាតិ

អង់គ្លេស ថាមានព័ស្តុតាងដែល ចិន ផ្ដល់ជំនួយច្រើនសន្ធឹកសន្ធាប់ឲ្យ រុស្ស៊ី

បានផុស

១០ ខែ មុន

នៅ

ថ្ងៃព្រហស្បតិ៍ ២៣ ឧសភា ២០២៤

ដោយ

រដ្ឋមន្ត្រីការពារជាតិអង់គ្លេសលោក Grant Shapps បានចោទប្រកាន់ប្រទេសចិនថាបានផ្តល់ជំនួយដ៏ច្រើនសន្ធឹកសន្ធាប់ដល់រុស្ស៊ីប្រើក្នុងសង្គ្រាមលុកលុយលើអ៊ុយក្រែន ដោយមានព័ស្តុតាងពីទិន្នន័យស៊ើបការណ៍សម្ងាត់របស់សហរដ្ឋអាមេរិក និងអង់គ្លេស ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២២ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរដ្ឋមន្ត្រីការពារជាតិអង់គ្លេសលោក Grant Shapps បានអះអាងថា ការស៊ើបការណ៍សម្ងាត់របស់សហរដ្ឋអាមេរិក និងអង់គ្លេសមានព័ស្តុតាងថា ជំនួយដ៏ច្រើនសន្ធឹកសន្ធាប់នេះត្រូវបានបញ្ជូនចេញពីប្រទេសចិនទៅកាន់ប្រទេសរុស្ស៊ី ប៉ុន្តែលោកមិនបានផ្តល់ពត៌មានលម្អិតដើម្បីគាំទ្រការអះអាងនេះនោះទេ ។

ឆ្លើយតបនឹងការចោទប្រកាន់នេះ ចិនបានបដិសេធម្តងហើយម្តងទៀត ដោយស្ថានទូតចិនប្រចាំនៅសហរដ្ឋអាមេរិកបានអះអាងថា ចិនមិនបានផ្តល់អាវុធ មិនមែនជាអ្នកផលិត និងមិនជាប់ពាក់ព័ន្ធនឹងវិបត្តិនៅអ៊ុយក្រែននោះទេ ខណៈស្ថានទូតចិនប្រចាំទីក្រុងឡុងដ៍មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ ។

មួយវិញទៀតបើយោងតាមបទសម្ភាសន៍ជាមួយ BBC ក្នុងអំឡុងដំណើរទស្សនកិច្ចទៅកាន់ទីក្រុងប៉េកាំងកាលពីខែមុន រដ្ឋមន្ត្រីការបរទេសអាមេរិកលោក Anthony Blenken បាននិយាយថា ចិនជាប្រទេសដែលរួមចំណែកសំខាន់ក្នុងការការពារជាតិ និងមូលដ្ឋានឧស្សាហកម្មរុស្ស៊ី ។

ក្នុងនោះទីក្រុងមូស្គូទទួលបាន ៩០ ភាគរយនៃមីក្រូអេឡិចត្រូនិចមកពីប្រទេសចិន ហើយគិតត្រឹមឆ្នាំ ២០២៣ ប្រទេសចិនបានក្លាយជាដៃគូពាណិជ្ជកម្មដ៏សំខាន់របស់រុស្ស៊ី ហើយរុស្ស៊ីក៏គឺជាដៃគូពាណិជ្ជកម្មធំបំផុតទី៦ របស់ចិនផងដែរ ៕