ព័ត៌មានអន្ដរជាតិ

ចិន ចង់ធ្វើជាអ្នកសម្របសម្រួលក្នុងសង្គ្រាមហាម៉ាស-អ៊ីស្រាអ៊ែល

បានផុស

៤ ថ្ងៃ មុន

នៅ

ថ្ងៃចន្ទ ២៧ ឧសភា ២០២៤

ដោយ

ចិន នឹងរៀបចំបើកសន្និសីទថ្នាក់រដ្ឋមន្ត្រី “China-Arab States Cooperation Forum” លើកទី១០ ចាប់ពីថ្ងៃទី២៨ ខែឧសភា ដល់ថ្ងៃទី១ ខែមិថុនា ឆ្នាំ២០២៤។ កិច្ចប្រជុំនេះ ផ្ដោតសំខាន់លើគោលបំណងរបស់ចិន ដែលចង់ធ្វើជាអ្នកសម្របសម្រួលនៅក្នុងសង្គ្រាមរវាងក្រុមហាម៉ាស និងប្រទេសអ៊ីស្រាអ៊ែល។

លោក ស៊ី ជីនពីង ប្រធានាធិបតីចិន (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក Hua Chunying អ្នកនាំពាក្យក្រសួងការបរទេសចិន បានឲ្យដឹងថា ជំនួបលើកនេះ នឹងមានការចូលរួមពីគណៈប្រតិភូដូចជា លោក Abdel Fattah al-Sisi ប្រធានាធិបតីអេហ្ស៊ីប, ព្រះអង្គម្ចាស់ Hamad ស្ដេចប្រទេសបារ៉ែន, លោក Kais Saied ប្រធានាធិបតីទុយនេស៊ី និងព្រះអង្គម្ចាស់ Sheikh Mohamed bin Zayed Al Nahyan ប្រធានាធិបតីសហព័ន្ធអារ៉ាប់រួម។

ក្រៅតែពីការពង្រឹងចំណងមិត្តភាពឲ្យកាន់តែស៊ីជម្រៅជាមួយបណ្ដាប្រទេសអារ៉ាប់ កិច្ចប្រជុំលើកនេះ បានបង្ហាញពីបំណងរបស់មហាយក្សចិន ក្នុងការចង់ធ្វើជាអ្នកសម្របសម្រួលនៅក្នុងសង្គ្រាមរវាងក្រុមសកម្មប្រយុទ្ធប៉ាឡេស្ទីន និងប្រទេសអ៊ីស្រាអ៊ែល។ ចិនធ្លាប់បង្ហាញពីការអាណិតអាសូរចំពោះបុព្វហេតុប៉ាឡេស្ទីន និងគាំទ្រ “ដំណោះស្រាយរដ្ឋ២” នៅក្នុងជម្លោះរវាងបដិបក្ខទាំងសងខាង។ លោក ស៊ី ជីនពីង មេដឹកនាំចិន បានអំពាវនាវឲ្យមាន “សន្និសីទសន្តិភាពអន្តរជាតិ” ដើម្បីដោះស្រាយនូវបញ្ហាសង្គ្រាមមួយនេះ។

កាលពីខែវិច្ឆិកា ឆ្នាំ២០២៣កន្លងទៅ រដ្ឋាភិបាលក្រុងប៉េកាំងធ្លាប់បើកកិច្ចប្រជុំជាមួយរដ្ឋមន្ត្រីក្រសួងការបរទេសប៉ាឡេស្ទីន ឥណ្ឌូណេស៊ី អេហ្ស៊ីប អារ៉ាប៊ីសាអូឌីត និងហ្ស៊កដានី សម្រាប់ការពិភាក្សា ដែលមានគោលបំណងកាត់បន្ថយភ្លើងជម្លោះនៅតំបន់ហ្គាហ្សា។

សូមបញ្ជាក់ថា ការវាយប្រហារនៅថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាស នៅភាគខាងត្បូងប្រទេសអ៊ីស្រាអ៊ែល បានបណ្ដាលឲ្យមានមនុស្សស្លាប់ជាង ១ ១៧០នាក់ ក្នុងនោះភាគច្រើនគឺជាជនស៊ីវិល ហើយក៏មានការចាប់ចំណាប់ខ្មាំងចំនួន ២៥២នាក់ផងដែរ។ នេះបើយោងតាមរបាយការណ៍ចុះផ្សាយដោយសារព័ត៌មាន AFP។

ជាការសងសឹក ក្រុមយោធាអ៊ីស្រាអ៊ែល បានវាយបក និងសម្លាប់មនុស្សយ៉ាងហោចណាស់ ៣៥ ៩៨៤នាក់នៅតំបន់ហ្គាហ្សា ហើយភាគច្រើនគឺជាជនស៊ីវិល៕

ដោយ៖ ឈាង