ព័ត៌មានអន្ដរជាតិ

រដ្ឋមន្ត្រីការពារជាតិអាមេរិក-ចិន ទល់មុខគ្នាដោះស្រាយភាពតានតឹងម្ដងទៀត ក្រោយជំនួបនៅកម្ពុជា

បានផុស

២ years មុន

នៅ

ថ្ងៃសុក្រ ៣១ ឧសភា ២០២៤

ដោយ

Chheang

ប្រមុខការពារជាតិសហរដ្ឋអាមេរិក និងប្រទេសចិន បានចាប់ផ្ដើមជំនួបទល់មុខគ្នាដោយផ្ទាល់ នៅព្រឹកថ្ងៃសុក្រទី៣១ ខែឧសភា នេះ ដើម្បីស្វែងរកដំណោះស្រាយចំពោះភាពតានតឹងរវាងមហាអំណាចទាំង២។ ជំនួបម្ដងលើកមុន ធ្វើឡើងចាប់តាំងតែពីខែវិច្ឆិកា ឆ្នាំ២០២២មកម៉្លេះ ក្នុងកិច្ចប្រជុំកំពូលរដ្ឋមន្ត្រីក្រសួងការពារជាតិ នៃសមាគមប្រជាជាតិអាស៊ីអាគ្នេយ៍ ក្នុងប្រទេសកម្ពុជា។

លោក Dong Jun រដ្ឋមន្ត្រីការពារជាតិចិន និងលោក Lloyd Austin រដ្ឋមន្ត្រីការពារជាតិអាមេរិក

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបរវាងលោក Lloyd Austin រដ្ឋមន្ត្រីការពារជាតិអាមេរិក និងលោក Dong Jun រដ្ឋមន្ត្រីការពារជាតិចិន បានប្រព្រឹត្តមុនការចាប់ផ្ដើមនៃសន្និសីទសន្ដិសុខប្រចាំឆ្នាំដ៏ធំនៅអាស៊ី Shangri-La Dialogue ដែលត្រៀមធ្វើនៅប្រទេសសិង្ហបុរី នាចុងសប្ដាហ៍នេះ។

ភាគីទាំង២ ត្រូវគេរំពឹងថា បានពិភាក្សាអំពីការរក្សានូវទំនាក់ទំនងយោធាដោយបើកចំហ ចំពេលដែលមានការព្រួយបារម្ភខ្លាចថាទំនាក់ទំនងនេះកាន់តែយ៉ាប់យ៉ឺនឡើងៗឈានដល់ការបង្កើតជាសង្គ្រាម។ ស្នូលនៃបញ្ហារវាងមហាយក្សទាំង២បច្ចប្បន្ន ផ្ដើមចេញពីការធ្វើសមយុទ្ធជារឿយៗរបស់ចិនជុំវិញតៃវ៉ាន់ ដែលចិនតែងតែអះអាងថា ដែនកោះមួយនេះគឺជាអធិបតេយ្យភាពរបស់ខ្លួន ក្រោមគោលនយោបាយបង្រួបបង្រួមចិនតែមួយ។

ក្រៅតែពីបញ្ហាកោះតៃវ៉ាន់ ក្នុងជំនួបនេះ ក៏អាចមានរបៀបវារៈអំពីបញ្ហាជាច្រើនដូចជា ជម្លោះនៅសមុទ្រចិនខាងត្បូង, ការផលិតអាវុធនុយក្លេអ៊ែររបស់កូរ៉េខាងជើង និងសង្គ្រាមរុស្ស៊ី-អ៊ុយក្រែន ជាដើម។

សូមបញ្ជាក់ថា លោក Austin និងលោក Dong ធ្លាប់បានពិភាក្សាគ្នាម្ដងរួចមកហើយតាមរយៈទូរសព្ទ កាលពីខែមេសាកន្លងទៅ ដោយភាគីចិនបានប្រាប់អាមេរិកឲ្យរកវិធីសម្របសម្រួល និងបង្កើនការជឿទុកចិត្តគ្នាបន្តិចម្ដងៗ តាមរយៈការបង្កើតទំនាក់ទំនងមិនមានជម្លោះ មិនប្រឈមមុខគ្នា បើកចំហ និងជាក់ស្ដែង រវាងយោធាប្រទេសទាំងសងខាង៕

ដោយ៖ ឈាង