ព័ត៌មានអន្ដរជាតិ

ទីភ្នាក់ងាររដ្ឋអាមេរិក CRS បង្ហាញពីចំនួនទ្រព្យសម្បត្តិរបស់លោក ស៊ី ជីនពីង

បានផុស

២ years មុន

នៅ

ថ្ងៃចន្ទ ១០ មិថុនា ២០២៤

ដោយ

Chheang

លោក ស៊ី ជីនពីង មេដឹកនាំប្រទេសចិន កំពុងមានទ្រព្យសម្បត្តិប្រមាណជា ៧០០លានដុល្លារនៅក្នុងដៃ។ នេះបើយោងតាមរបាយការណ៍របស់ទីភ្នាក់ងារស្រាវជ្រាវសភាសហរដ្ឋអាមេរិក ហៅកាត់ថា CRS ហើយត្រូវបានចុះផ្សាយដោយសារព័ត៌មាន The Washington Times កាលពីថ្ងៃអាទិត្យទី៩ ខែមិថុនា ឆ្នាំ២០២៤។

លោក ស៊ី ជីនពីង មេដឹកនាំប្រទេសចិន (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍របស់ CRS បានបង្ហាញថា ទ្រព្យសម្បត្តិមេដឹកនាំចិន មានប្រភពចេញពីការវិនិយោគតាមក្រុមហ៊ុននានា និងចំណែកភាគហ៊ុននៅក្នុងឧស្សាហកម្មធំៗជាច្រើន។ បើគិតត្រឹមឆ្នាំ២០១២កន្លងទៅ លោក ស៊ី ជីនពីង មានការវិនិយោគទុនតាមក្រុមហ៊ុនក្នុងទំហំទឹកប្រាក់ចំនួន ៣៧៦លានដុល្លារ, ចំណែកភាគហ៊ុន ១៨% ស្មើនឹង ៣១១លានដុល្លារនៅក្នុងក្រុមហ៊ុនជីកយករ៉ែ និង ២០,២លានដុល្លារនៅក្នុងក្រុមហ៊ុនបច្ចេកវិទ្យា។ យ៉ាងណាមិញ CRS បានបញ្ជាក់ថា ទ្រព្យសម្បត្តិទាំងនោះត្រូវបានបែងចែក និងកាន់កាប់ដោយសមាជិកក្រុមគ្រួសាររបស់លោក ស៊ី ជីនពីង ដែលមានដូចជា កូនស្រីរបស់លោកឈ្មោះ Xi Mingze, ភរិយាឈ្មោះ Peng Liyuan, បងស្រីឈ្មោះ Qi Qiaoqiao, បងថ្លៃប្រុសឈ្មោះ Deng Jiagui និងក្មួយស្រីឈ្មោះ Zhang Yannan។

CRS បានបញ្ជាក់ថា ព័ត៌មានពាក់ព័ន្ធនឹងទ្រព្យសម្បត្តិរបស់មន្ត្រីជាន់ខ្ពស់បក្សកុម្មុយនិស្តប្រទេសចិន មិនត្រូវបានបង្ហាញឲ្យដឹងជាសាធារណៈនោះទេ។ CRS ថា “បក្សកុម្មុយនិស្តចិន មិនតម្រូវឲ្យមន្ត្រីរបស់ខ្លួន បង្ហាញទ្រព្យសម្បត្តិជាសាធារណៈទេ ហើយប្រព័ន្ធផ្សព្វផ្សាយត្រូវធានាឲ្យបានថា របាយការណ៍ដែលមិនមានការអនុញ្ញាតពីរដ្ឋ ឬការពិភាក្សាពាក់ព័ន្ធនឹងរឿងទ្រព្យសម្បត្តិ និងអំពើពុករលួយនៃក្រុមអ្នកដឹកនាំជាន់ខ្ពស់ ឬក៏សាច់ញាតិរបស់ពួកគេ មិនត្រូវលេចឡើង ឬត្រូវលុបចោលភ្លាមៗពីប្រព័ន្ធផ្សព្វផ្សាយនៃសាធារណរដ្ឋប្រជាមានិតចិន”៕

ដោយ៖ ឈាង

Related Topics:លោក ស៊ី ជីនពីង