ព័ត៌មានអន្ដរជាតិ

ត្រឹម៤ថ្ងៃក្រោយ លោក ត្រាំ ចាកចេញពីប៉េកាំង ពូទីន រួតរះទៅជួប លោក ស៊ី បញ្ជាក់ពី«មិត្តភាពមិនអាចបំបែកបាន»

បានផុស

២ ខែ មុន

នៅ

ថ្ងៃចន្ទ ១៨ ឧសភា ២០២៦

ដោយ

ដំណើរទស្សនកិច្ចរបស់មេដឹកនាំរុស្ស៊ី លោក វ៉្លាឌីមៀរ ពូទីន ទៅកាន់ទីក្រុងប៉េកាំងនៅថ្ងៃទី១៩និងទី២០ ខែឧសភានេះ កំពុងតែទាក់ទាញការតាមដានលើភាពប្រែប្រួលក្នុងនយោបាយអន្តរជាតិ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ ទើបបញ្ចប់ការសន្ទនាជាមួយប្រធានាធិចិន លោក ស៊ី ជីនពីង ត្រឹមតែ៤ថ្ងៃប៉ុណ្ណោះ។

លោក ពូទីន រៀបចំពីធីទទួលលោក ស៊ី កាលឆ្នាំ២០២៣ នៅទីក្រុងមូស្គូ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសអំពីដំណើរទស្សនកិច្ចរបស់លោក ពូទីន ទៅកាន់ទីក្រុងប៉េកាំង ដោយវិមានក្រឹមឡាំង បានធ្វើឲ្យអ្នកតាមដានព្រឹត្តិការណ៍សកលងាកមកផ្តោតការយកចិត្តទុកដាក់យ៉ាងខ្លាំងចំពោះការប្រែប្រួលដ៏ឆាប់រហ័ស ក្នុងនយោបាយអន្តរជាតិ ស្របពេលជម្លោះក្នុងពិភពលោកស្ថិតក្នុងសភាពជាប់គាំងក្នុងដំណើរការចរចារកដំណោះស្រាយសន្តិភាព។

វិមានក្រឹមឡាំង បានបញ្ចេញឲ្យដឹងជាផ្លូវការកាលពីថ្ងៃសៅរ៍កន្លងទៅ ថា ដំណើរទស្សនកិច្ចរបស់លោក ពូទីន ទៅកាន់ទីក្រុងប៉េកាំង ដើម្បីជួបលោក ស៊ី ជីនពីង សម្រាប់ការពិភាក្សាលើកិច្ចសហប្រតិបត្តិការទ្វេភាគីកាន់តែស៊ីជម្រៅ និងដោះស្រាយបញ្ហាអន្តរជាតិសំខាន់ៗ។

តាមសេចក្តីប្រកាសនោះ មេដឹកនាំរុស្ស៊ី និងចិន រំពឹងថា នឹងចុះហត្ថលេខាលើសេចក្តីថ្លែងការណ៍រួម និង កិច្ចព្រមព្រៀងជាច្រើនទៀត។

មុនពេលដំណើរទស្សនកិច្ចរបស់ប្រធានាធិបតីរុស្ស៊ី វ្ល៉ាឌីមៀរ ពូទីន ដែលគ្រោងចាប់ផ្តើមនៅថ្ងៃអង្គារ ទី១៩ ខែឧសភា ប្រព័ន្ធផ្សព្វផ្សាយរដ្ឋចិនស៊ីនហួរ បានរាយការណ៍ថា ទំនាក់ទំនងចិន-រុស្ស៊ីនៅតែ «មិនអាចធ្វើឲ្យរង្គោះរង្គើបាន» នៅចំពោះមុខពិភពលោក «ស្មុគស្មាញ និងងាយនឹងប្រែប្រួល»។

ទីភ្នាក់ងារសារព័ត៌មានរដ្ឋស៊ីនហួរ នៅថ្ងៃអាទិត្យបានរាយការណ៍ថា ក្នុងរយៈពេលមួយទសវត្សរ៍កន្លងមកនេះ ប្រធានាធិបតីចិន ស៊ី ជីនពីង និងលោកពូទីន បានរក្សា «ការទំនាក់ទំនងយ៉ាងជិតស្និទ្ធ» តាមវិធីផ្សេងៗគ្នា។

សេចក្តីរាយការណ៍នោះ ក៏បានបញ្ជាក់ថា៖ «ការទូតប្រមុខរដ្ឋគឺជាគុណសម្បត្តិដ៏ធំបំផុត និងជាការធានាជាមូលដ្ឋានសម្រាប់ការអភិវឌ្ឍកម្រិតខ្ពស់នៃទំនាក់ទំនងចិន-រុស្ស៊ី»។

កាសែតរដ្ឋចិននេះ បានបន្ថែមថា នៅចំពោះមុខ «ស្ថានភាពអន្តរជាតិដ៏ស្មុគស្មាញ និងងាយនឹងប្រែប្រួល» និងក្រោម «ការណែនាំជាយុទ្ធសាស្ត្រ» របស់មេដឹកនាំទាំងពីរ ទំនាក់ទំនងចិន-រុស្ស៊ីនឹង «ផ្តល់ឱ្យពិភពលោកនូវស្ថិរភាព និងភាពប្រាកដប្រជា»។

សារព័ត៌មាន BBC របស់អង់គ្លេស បានរាយការណ៍ថា ជំនួបរវាងប្រធានាធិបតីសហរដ្ឋអាមេរិក និងសមភាគីចិន លោក ស៊ី ជីនពីង លើកនេះ បានជួយលើកមុខមាត់ចិនឲ្យស្ថិតនៅកម្រិតខ្ពស់ជាសកល។ ក្នុងសេចក្តីរាយការណ៍នោះ បានលើកឡើងនូវភាពស្រពេចស្រពិលដែល បង្ហាញនូវភាពជោគជ័យរវាងសហរដ្ឋអាមេរិក និង ចិន បើទោះបីជាលោក ត្រាំ ថា ជោគជ័យ ប៉ុន្តែការបង្ហាញពីភាពជោគជ័យមានកម្រិតតិចតួច។

ងាកមកមើលទំនាក់ទំនងរុស្ស៊ីនិងចិនវិញ យោងតាមស៊ីនហួរ «កិច្ចសហប្រតិបត្តិការជាក់ស្តែង» គឺជាកម្លាំងចលករនៅពីក្រោយទំនាក់ទំនងចិន-រុស្ស៊ី ហើយកិច្ចសហប្រតិបត្តិការរវាងប្រទេសទាំងពីរក្នុងវិស័យផ្សេងៗនៅតែ «រឹងមាំ ទោះបីជាមានការសាកល្បង និងការវាយប្រហាររាប់មិនអស់ក៏ដោយ»។

ពាណិជ្ជកម្មទ្វេភាគីរវាងចិន និងរុស្ស៊ីបានលើសពី ២០០ពាន់លានដុល្លារអាមេរិករយៈពេលបីឆ្នាំជាប់ៗគ្នា។ នេះបើយោងតាមស៊ីនហួរ។ ទន្ទឹមនឹងនេះ វិស័យដែលកំពុងរីកចម្រើនដូចជា បញ្ញាសិប្បនិម្មិត អាកាសចរណ៍ សេដ្ឋកិច្ចបៃតង និងពាណិជ្ជកម្មអេឡិចត្រូនិកឆ្លងដែន ក៏កំពុងរីកចម្រើនផងដែរ។

ទិន្នន័យចុងក្រោយបំផុតដែលចេញផ្សាយដោយក្រសួងពាណិជ្ជកម្មចិន បានបង្ហាញថា ពាណិជ្ជកម្មចិន-រុស្ស៊ីបានឈានដល់ ២២៧,៩ ពាន់លានដុល្លារអាមេរិកក្នុងឆ្នាំ ២០២៥ ហើយចិននៅតែជាដៃគូពាណិជ្ជកម្មធំបំផុតរបស់រុស្ស៊ីសម្រាប់ឆ្នាំទី ១៦ ជាប់ៗគ្នា៕

រ៉ាន់ រើយ